Gjyqi për Gërdecin, Mediu: S’kam përgjegjësi penale, erdha për respekt të gjykatës. Nuk e zhbëj dot atë që ndodhi

Pas shumë orësh në GJKKO ku dëshmoi për tragjedinë e Gërdecit ku vdiqën 26 persona, pas daljes në një prononcim për mediat, ish-ministri i Mbrojtjes Fatmir Mediu tha se ishte shkelur parashkrimi dhe se procesi duhet të jetë i rregullt. Ai  theksoi se në asnjë moment nuk ka qenë njoftuar për probleme në Gërdec gjatë kohës kur ishte ministër i Mbrojtjes.

”Dëshmitarët e mëparshëm nuk kanë pasur ndonjë punë me ministrin e Mbrojtjes. Erdha sot për respekt të gjykatës dhe drejtësisë dhe për të shprehur keqardhjen time të madhe ndaj familjarëve.

Unë hoqa dorë nga posti im asokohe dhe nuk e zhbëj dot atë që ka ndodhur. Mendoj se është shkelur një nga pikat të garancisë së procesit gjyqësor, ajo e parashkrimit. Ministri i Mbrojtjes nuk ka pasur asnjë moment të vetëm ku të jetë njoftuar që ka pasur problem në Gërdec”,-tha Mediu.