Ilir Meta në Kongresin e të Rinjve Socialistë: Europa nuk ka vullnetin të shohë përtej kufijve

Kryetari i Lëvizjes Socialiste për Integrim, Ilir Meta mori pjesë në çeljen e punimeve të Kongresit të Internacionales së të Rinjve Socialistë (IUSY), që po zhvillohet në Tiranë.

Në aktivitetin me temë “Ndërtojmë paqen, të ndryshojmë sistemin” morën pjesë edhe Kryetari i PS-së, Edi Rama, Presidenti i IUSY, z. Felipe Jeldres, Sekretarja e Përgjithshme e IUSY, Evin Incir, Zëvendëssekretari i Përgjithshëm i Partisë Socialiste Evropiane, Giacciomo Filibeck, deputetja e LSI-së, Kejdi Mehmetaj si edhe mjaft personalitete të tjera të së majtës evropiane dhe asaj botërore.

Duke marrë fjalën gjatë kongresit, Kryetari i LSI-së, Ilir Meta, pasi rëndësinë e këtij aktiviteti tha se anëtarët e IUSY-t janë një komunitet i mrekullueshëm, që ndan vlerat njerëzore të social-demokracisë dhe të progresit, duke besuar e punuar për një drejtësi sociale, solidaritet e liri.

“Këto vlera dhe këto parime po sfidohen sot nga kërcënimet në rritje, që vijnë nga disa anë të botës. Sfidat që janë të mbushura me përjashtime, intolerancë, varfëri dhe injorancë. Paqja po kërcënohet dhe prosperiteti i kombeve tona është në një rrezik të lartë. Ngjarjet e fundit në Lindjen e Mesme, Azinë Qendrore dhe në Mesdhe demonstruan limitet e shoqërisë sonë për të përballuar me sukses këto kërcënime dhe ndryshime të reja, – tha z. Meta. – Ne jemi dëshmitarë të një vale të dëshpëruar njerëzish që largohen nga shtëpitë e tyre për t’i shpëtuar nga terrori dhe shfarosja. Mungon solidariteti dhe ndarja e përgjegjësive. Në vend të përpjekjeve dhe veprimeve të përbashkëta, bota shikon teksa ndërtohen mure dhe idhuj, për të parandaluar që njerëzit e pashpresë të ikin nga zonat e luftës dhe mizoritë që na risjellin në vëmendje kujtimet e kohëve më të errëta”, – theksoi Kryetari i LSI-së.

Meta u shpreh se të majtë dhe të djathtë luftojnë njëri-tjetrin mbi ideologjinë, duke neglizhuar faktin se paqja është parakusht për përparimin dhe zhvillimin. Sipas Kryetarit të LSI-së, kjo është koha e duhur tani që të jemi të bashkuar dhe t’i japin jetë një vale të re të pjesëmarrjes në demokraci.

“Solidariteti e ka humbur kuptimin dhe është zëvendësuar nga llogaritje të ngushta të përfitimeve të përditshme politike. Të jesh strategjik do të thotë të jesh largpamës. Por dritëshkurtësia mbizotëron dhe Europa sot nuk ka vullnetin të shohë përtej kufijve të saj e kështu harron se ka njerëz njësoj si ata që jetojnë në anën tjetër. Energji të detyrueshme janë të nevojshme për të kapërcyer këtë pengesë të krizës ekzistenciale. Duhet të sfidojmë rrënjët e kësaj situate, teksa ajo është përkeqësuar para syve tanë dhe pabarazia nuk përkon me zhvillimin e qëndrueshëm, hendeku midis atyre që kanë dhe atyre që nuk kanë sa vjen e rritet, mjedisi po përkeqësohet dhe ekonomia globale e tregjet sjellin pasuri të përqendruar në duart e elitës. Pjesa tjetër po shkon drejt mjerimit”, – deklaroi z. Ilir Meta.

Në fjalën e tij, kryetari i Partisë Socialiste z. Edi Rama përshëndeti të gjithë delegatët duke thënë se politika është mjeti më i mirë për të sjellë diferencat.

“Dua të filloj me një citim të një aktivisti amerikan i cili tha: “Ai që mendon se është i vogël për të bërë një dallim, asnjëherë nuk është pickuar nga një mushkonjë. Unë vërtet besoj se kushdo mund të bëjë një diferencë pavarësisht nga përmasa dhe vendi ku ndodhet, por është e sigurt se politika është mjeti më i mirë për të sjellë diferencat dhe për të bashkuar forcat. Unë besoj se organizata rinore janë jetësore përsa i përket politikës dhe për përpjekjet e çdo komuniteti që shoqëria të ndryshojë”, u shpreh z. Rama.

Në vijim të fjalës së tij, z. Rama i bëri thirrje të rinjve të internacionales që të vizitojnë Shqipërinë si një vet tepër atraktiv. “Shqipëria është një vend që kur vini njëherë do të dëshironi të ktheheni sërish. Shqipëria ka probleme por ka edhe sekrete, Nuk është asnjëherë e mërzitshme. Duke ardhur këtu dhe duke zhvilluar kongresin tuaj ju po na ndihmoni të rinjtë tanë që të mendojnë si të forcohen”,- tha ndër të tjera kryetari i Partisë Socialiste.

Presidenti i IUSY, z. Felipe Jeldres, theksoi përpara të rinjve të internacionales socialiste se ky kongres po zhvillohet për të vendosur piketat e së ardhmes për të ndryshuar shoqëritë botërore duke u bazuar në parime dhe principe për ta bërë këtë botë më të mirë.

“Ky është kongresi ku ne do të diskutojmë dhe do të reflektojmë mbi atë çka do të ndryshojmë në botë si një organizatë botërore me kapacitetin që kemi për t’i bërë këto ndryshime. Ne duam të ndërtojmë një botë që bazohet mbi principet dhe vlerat. Unë kam udhëtuar personalisht për të marrë pjesë në të tjera Kongrese të Internacionales Socialiste dhe kam bindjen që të marrësh përgjegjësitë përsipër është sigurisht rruga më e mirë. Dhe ne jemi këtu jo vetëm për të mësuar në mënyrë të vazhdueshme se si mund të bëjmë përmirësime dhe të ndryshojmë shoqërinë, por dhe për të hedhur piketat e të ardhmes në këtë kongres”, – theksoi ndër të tjera Presidenti i IUSY Felipe Jeldres.

Pjesë e panelit ishte edhe deputetja e LSI-së, Kejdi Mehmetaj, njëherësh Nënkryetare e LRI-së, e cila mbajti një fjalë përshëndetëse duke nënvizuar rolin e rëndësishëm të IUSY-t.

“Ky është një moment që të gjithë ne duhet ta shijojmë dhe të mos zgjatemi me fjalime të gjata. 6 vjet para se të përfshihesha në aktivitet e IUSY, mendoj se kemi ecur goxha gjatë. Këtë e kemi bërë të gjithë së bashku, me të gjithë personat e IUSY . Kemi qenë shumë produktiv në të gjitha aspektet dhe për interesin e njerëzve”, – theksoi deputetja Kejdi Mehmetaj.

Në vijim të fjalës së saj, Nënkryetarja e Lëvizjes Rinore për Integrim vuri në dukje sfidat e rinisë shqiptare duke shtuar se ato janë të ngjashme me rininë botërore dhe për këtë duhet të forcohet bashkëpunimi në këtë organizatë. “Ne kemi nevojë që ta forcojmë bashkëpunimin tonë dhe të kemi një mbështetje të rëndësishme që do të bëjmë një politikë më të mirë për rininë në Shqipëri dhe në të gjithë botën. Tema e këtij kongresi është ‘Të ndryshojmë sistemin’ dhe shpresoj që këto dy ditë do të kemi mundësinë që të shikojmë dhe cilat janë sfidat e rinisë së sotme. Do të bëjmë diskutime të cilat besojmë që do të dalin në përfundim me diskutime dhe me vendime të rëndësishme dhe të nevojshme”, – tha ndër të tjera Nënkryetarja e LRI-së, Kejdi Mehmetaj.

Fjala e Kryetarit të LSI-së, z. Ilir Meta gjatë Kongresit të IUSY

Të nderuar delegatë! Të nderuar shokë

Është një kënaqësi dhe një nder i madh për mua sot që të jem mes jush, me shokë të vjetër dhe të rinj, në këtë aktivitet vërtetë të veçantë, Kongresin e Internacionales së të Rinjve Socialistë. Sot, unë vërtetë ndihem sërish i ri.

Jam gjithashtu shumë i gëzuar dhe i impresionuar me organizimin e shkëlqyer të Kongresit të IUSY-t për herë të parë në Tiranë dhe dëshiroj të shpreh përgëzimet më të ngrohta dhe mirënjohjen time të gjithë atyre që punuan shumë fort që kjo të ndodhte.

Kjo ka qenë ëndrra ime e rinisë kur me shumë shokë të tjerë, ne themeluam lëvizjen dhe organizatën e parë Euro-Socialiste në Shqipëri dhe lidhëm kontakte të ngushta miqësie me mijëra shokë nga e gjithë Europa dhe bota.

Sot, kjo ëndërr u bë realitet. Ju falënderoj sërish që bëtë të mundur që kjo të ndodhte.

IUSY është një organizatë globale me qindra mijë anëtarë nga e gjithë bota. Ju jeni një komunitet i mrekullueshëm si asnjë tjetër, që ndani vlerat njerëzore të social-demokracisë dhe të progresit, duke besuar dhe duke punuar për një drejtësi sociale, solidaritet, liri dhe barazi sociale.

Këto vlera dhe këto parime po sfidohen sot nga kërcënimet në rritje, që vijnë nga disa anë të botës.

Sfidat që janë të mbushura me përjashtime, intolerancë, varfëri dhe injorancë. Paqja po kërcënohet dhe prosperiteti i kombeve tona është në një rrezik të lartë.

Ngjarjet e fundit në Lindjen e Mesme, Azinë Qendrore dhe në Mesdhe demonstruan limitet e shoqërisë sonë për të përballuar me sukses këto kërcënime dhe ndryshime të reja.

Ne jemi dëshmitarë të një vale të dëshpëruar njerëzish që largohen nga shtëpitë e tyre për t’i shpëtuar nga terrori dhe shfarosja. Mungon solidariteti dhe ndarja e përgjegjësive.

Në vend të përpjekjeve dhe veprimeve të përbashkëta, bota shikon teksa ndërtohen mure dhe idhuj, për të parandaluar që njerëzit e pashpresë të ikin nga zonat e luftës dhe mizoritë që na risjellin në vëmendje kujtimet e kohëve më të errëta.

Socialdemokratët dhe progresistët janë përfshirë në debate të padobishme. Të majtë dhe të djathtë luftojnë njëri-tjetrin mbi ideologjinë, duke neglizhuar faktin se paqja është parakusht për përparimin dhe zhvillimin.

Kjo është koha e duhur tani që të jemi të bashkuar dhe t’i japin jetë një vale të re të pjesëmarrjes në demokraci.

Le të shohim Evropën. Dikur djepi i vlerave civilizuese dhe humaniste, tashmë ka humbur në përkthimin e multikulturalizmit dhe divergjencave të saj ndërmjet vendeve anëtare të vjetra dhe të reja anëtare të BE, mes veriut të pasur dhe jugut të varfër.

Solidariteti e ka humbur kuptimin dhe është zëvendësuar nga llogaritje të ngushta të përfitimeve të përditshme politike. Të jesh strategjik do të thotë të jesh largpamës. Por dritëshkurtësia mbizotëron dhe Europa sot nuk ka vullnetin të shohë përtej kufijve të saj e kështu harron se ka njerëz njësoj si ata që jetojnë në anën tjetër.

Energji të detyrueshme janë të nevojshme për të kapërcyer këtë pengesë të krizës ekzistenciale.

Duhet të sfidojmë rrënjët e kësaj situate, teksa ajo është përkeqësuar para syve tanë dhe pabarazia nuk përkon me zhvillimin e qëndrueshëm, hendeku midis atyre që kanë dhe atyre që nuk kanë sa vjen e rritet, mjedisi po përkeqësohet dhe ekonomia globale e tregjet sjellin pasuri të përqendruar në duart e elitës. Pjesa tjetër po shkon drejt mjerimit.

Ne duhet refuzojmë këtë realitet dhe të punojmë fort për ta ndryshuar atë. E kush më mirë se të rinjtë mund ta bëjnë këtë? IUSY me shtrirjen e saj globale, me qindra e mijëra anëtarë dhe aktivitete përreth botës është një organizatë e fuqishme që duhet të bëjë liderin. Liderin që do të ndryshojë botën dhe do ta bëjë atë një vend më të mirë për të gjithë. Të sjellë shpresë për botën dhe miliona të rinj që kanë nevojë për një arsim të mirë, punë të mirë, jetë të mirë dhe mbi të gjitha prosperitet në botë dhe jetë në paqe.

Do t’ju tregoj diçka nga eksperienca personale për të treguar se çfarë mund të bëjë IUSY.

Dy dekada më parë kur Shqipëria hodhi pas krahëve izolimin dhe ju bashkua botës së lirë, ne nuk kishim eksperiencë dhe dinim shumë pak për botën e re që qëndronte para nesh. Vend ynë bëri shumë gabime. Por, sot ne kemi mbështetjen e plotë dhe të fuqishme të shokëve tanë nga organizata simotra nga e gjithë Europa.

Qindra e mijëra përfaqësues të partive simotra të IUSY nga Suedia, Danimarka, Austria, Gjermania, Italia, Spanja, Holanda nuk na lanë vetëm. Ata erdhën këtu dhe çuan realitetin dhe problemet tona para syve të liderëve të tyre të lartë partiakë të cilët ndërhynë me guxim dhe vizion në mënyrë që të ndihmonin Shqipërinë të kalonte krizën e tranzicionit.

Unë sot dua t’u inkurajoj juve të bëni të njëjtën gjë sa herë dhe kudo të jetë e nevojshme.

Do të përfundoja duke shprehur në mënyrë të përmbledhur përshtypjet e këtyre ditëve. Ato më kthyen pas në kujtime të shkëlqyera. Në fakt, kjo ishte java ime e IUSY. Vizitova Suedinë dhe Danimarkën gjatë një jave. Ishte shumë emocionuese. Takova shumë miq të vjetër të IUSY, të cilët sot drejtojnë vendet dhe partitë e tyre. Tani është koha juaj të drejtoni botën.

Ju uroj suksese gjatë punimeve të kongresit tuaj dhe t’ju falënderoj që më bëtë të ndihesha përsëri i ri.