Importi i jahteve pa TVSH, Tabaku përshëndet kthimin e ligjit nga Meta: Ligj i palogjikshëm dhe kriminal

Ish- deputetja e Partisë Demokratike Jorida Tabaku në emër të PD-së ka përshëndetur vendimin e Presidentit të Republikës Ilir Meta për të kthyer ligjin për importin e jahteve pa TVSH, duke hequr këtë taksë.

Në një reagim përmes rrjeteve sociale, Tabaku thotë se ky ligj është i palogjikshëm dhe kriminal kur vendi është në një krizë të thellë për çdo shqiptar.

Më pas, Tabaku paralajmëron se shqiptarët do e tregojnë maturinë dhe vullnetin e tyre kundër kësaj mazhorance duke zgjedhur për të ardhmen, fëmijët dhe ekonominë e tyre.

“Në emër të Partisë Demokratike, përshëndes vendimin e Presidentit Meta për të kthyer ligjin që i heq TVSH-në blerjes së jahteve. Ky ligj është në vetvete i palogjikshëm dhe kriminal në një vend ku një pjesë e biznesit të vogël paguan TVSH-në ndërsa oligarkët dhe pazari i tyre jo. Por, ky projektligj bëhet edhe më i paturpshëm në kushtet e një krize të thellë që ka kapur jetën e çdo shqiptari. Kur bizneset mbyllen masivisht, kur papunësia rritet, kur konsumi ulet, investimet e të ardhurat bien e çdo taksë rritet qeveria përsëri mendon të favorizojë klientët e saj. Ky ligj u votua në Parlamentin kukull, disa ditë pasi qeveria i detyroi bizneset e goditura të vendit të paguanin TVSH-në edhe kur ishin te mbyllura. Një ligj që është dëshmi e radhës që mazhoranca nuk e ka mendjen tek qytetarët e vendit por tek një pakicë të cilën e furnizon me lehtësira fiskale si kjo që Presidenti Meta e rrëzoi. Shqiptarët do ta tregojnë me maturinë e tyre vullnetin kundër një mazhorance që është produkt i një ortakërie mes krimit të organizuar dhe oligarkisë. Shqiptarët do të zgjedhin për të ardhmen e tyre, për familjen e tyre, për ekonominë e tyre. Një vend që pritet të goditet me një varfëri që do të shkojë në gati 50% të popullsisë, një shoqëri e cila po pëson rritjen më të madhe të papunësisë nuk ka luksin për këto eksese të turpshme”, theksoi Tabaku.