Ja çfarë thotë Ronaldo për trofeun

Lotët e Cristiano Ronaldos, kanë qenë për disa ditë në vëmendjen mediatike, kjo për faktin se nuk ishin vetëm njëherë, e mesa duket do të jenë imazh i rezistencës në finalen e “Euro 2016”. Në finalen e së dielës mbrëma në Paris, në të cilën Portugalia mposhti Francën 1:0 pas vazhdimeve, Ronaldo qau dy herë.

Herën e parë qau nga dëshpërimi kur u detyrua të lërë fushën në minutën e 24-t shkaku i lëndimit, kurse herën e dytë lotët e Ronaldos ishin të gëzimit. Ylli portugez arriti që në moshën 31-vjeçare të ngrejë trofeun e parë për Portugalinë, raporton DW.

Kjo nuk ishte finalja e parë e Portugalisë në evropian e as lotët e parë të Ronaldos. Portugezi edhe para 12 vjetësh kishte qarë. Atëbotë ishte 19 vjeç dhe nuk përballoi humbjen në finalen e “Euro 2004” nga Greqia.

Portugalia që ishte organizatore e këtij evropiani u mposht 1:0 në Lisbonë. Për Ronaldon “Euro 2016” shihej si mundësia e fundit për të fituar ndonjë trofe me Portugalinë. Ai me Portugalinë ka debutuar në vitin 2003 dhe deri më tash ka shënuar 61 gola në 133 paraqitje.

“Jam shumë i lumtur. E kam kërkuar këtë trofe për një kohë shumë të gjatë, prej vitit 2004. E pata lutur Zotin edhe për një rast tjetër, pasi e kemi merituar. Kësaj here isha i pafat për shkak se u lëndova, por edhe pse nuk isha në fushë kam besuar në këta lojtarë”, është shprehur Ronaldo, duke shtuar se tashmë ka harruar dëshpërimin e vitit 2004.