Herion Mesi
Partia Demokratike është përfshirë në një proces të gjerë votimesh në kuadër të përzgjedhjes së kandidatëve që do ta përfaqësojnë partinë më të madhe të opozitës në zgjedhjet e ardhshme parlamentare që pritet të mbahen më 25 prill 2021.
Kështu pasi u publikua kalendari i votimeve nga strukturat e PD-së në 12 qarqe, tashmë zbardhet dhe fleta e votimit që anëtarësia e PD-së do të votojë sipas datave të përcaktuara.
Konkretisht, anëtarësia e Partisë Demokratike në Devoll pasi propozoi emrat e kandidatëve që dëshirojnë t’i përfaqësojë në parlamentin e ardhshëm, voton në datën 7 Tetor një listë të filtruar me 5 emra.
Më pas, anëtarët do të kenë mundësi të kontestojnë 1 kandidat ose të konfirmojnë listën në bllok. Pra, do votohet kundër veç një kandidati, ose do miratohet lista me 5 emra.
Kalendari i votimeve
Një ditë më parë Partia Demokratike zbardhi datat e votimit të kandidatëve për deputetë në Partinë Demokratike në 12 qarqe të vendit në kuadër të zgjedhjeve parlamentare të 25 prillit 2021.
Mësohet se Komisioni i Vlerësimit të Kandidatëve në PD, është drejt finalizimit të punës për përzgjedhjen e kandidatëve. Bëhet e ditur se votimi për deputetë të PD në qarkun e Kukësit do të bëhet më 25 shtator, në Dibër më 26 shtator, në Gjirokastër më 27 shtator, në Berat më 28 shtator.
Votimi për deputetë të PD-në në qarkun Shkodër do të bëhet më 30 shtator, në Lezhë më 1 tetor, në Durrës më 3 tetor, në Vlorë më 5 tetor. Qytetarët do votojnë për kandidatët për deputetë nga PD në rrethet Korçë më 7 tetor, në Fier më 8 tetor, dhe në Tiranë më 10 tetor.
“Anëtarësia e Partisë Demokratike nis këtë javë votimin për kandidatët potencialë për deputetë. Kjo është hera e parë që anëtarët e një partie politike në Shqipëri propozojnë dhe votojnë për ata që duan t’i përfaqësojnë në parlament. Votimi është menduar të bëhet çdo ditë në 1 qark dhe do të zgjasë rreth 2 javë. Anëtarët do të kenë mundësi të kontestojnë 1 kandidat ose të konfirmojnë listën në bllok. Kandidatët që shkojnë për votim janë rreth 400, nga 1000 që ishte numri i tyre në fazën e parë të vlerësimit. Ata u përzgjodhën nga Komisioni i Vlerësimit të Kandidatëve, të cilët kanë shqyrtuar, fillimisht, kriteret formale. Pas mbylljes së procesit të votimit nga anëtarësia, Komisioni i Vlerësimit të Kandidatëve do të mblidhet sërish për të vlerësuar kandidatët mbi kriterin e performancës politike dhe maksimalizimin e votës. Vendimi përfundimtar i Komisionit do t’i shkojë për miratim Kryesisë së PD”, thuhet në njoftimin e djeshëm të Partisë Demokratike.
Kalendari i votimeve
Qarku Kukës – 25 Shtator
Qarku Dibër – 26 Shtator
Qarku Gjirokastër – 27 Shtator
Qarku Berat – 28 Shtator
Qarku Shkodër – 30 Shtator
Qarku Lezhë – 1 Tetor
Qarku Durrës – 3 Tetor
Qarku Elbasan – 4 Tetor
Qarku Vlorë – 5 Tetor
Qarku Korçë – 7 Tetor
Qarku Fier – 8 Tetor
Qarku Tiranë – 10 Tetor