Ministria për Evropën dhe Punët e Jashtme ka reaguar lidhur me pritjet e gjata të regjistruara në pikat kufitare mes Kroacisë dhe Malit të Zi, duke theksuar se situata lidhet me fluksin e lartë të udhëtarëve gjatë sezonit veror dhe se po ndërmerren hapa për të lehtësuar lëvizjen e qytetarëve shqiptarë.
Sipas ministrisë, rritja e ndjeshme e lëvizjeve në rajon, sidomos gjatë muajve të verës, sjell çdo vit ngarkesë të madhe në këtë korridor rrugor, i cili përdoret nga mijëra shqiptarë që udhëtojnë drejt atdheut. Pritjet e gjata janë më të theksuara gjatë fundjavave dhe në ditët kur numri i udhëtarëve arrin kulmin.
Në reagimin zyrtar thuhet se Ministria për Evropën dhe Punët e Jashtme, së bashku me përfaqësitë diplomatike shqiptare, është në komunikim të vazhdueshëm me autoritetet përgjegjëse të vendeve përkatëse. Qëllimi është që, duke respektuar legjislacionin dhe procedurat kufitare të secilit shtet, të gjenden mënyra për ta bërë kalimin sa më të shpejtë dhe sa më efikas për qytetarët.
Ministria bën të ditur se po punohet për shtimin e kapaciteteve në pikat kufitare dhe për koordinimin e veprimeve me institucionet përgjegjëse, në mënyrë që të reduktohen sa më shumë radhët dhe koha e pritjes.
Sipas të dhënave zyrtare, vetëm gjatë sezonit veror rreth 300 mijë shtetas shqiptarë kalojnë përmes këtij korridori rrugor, një shifër që ushtron presion të konsiderueshëm mbi infrastrukturën kufitare dhe shërbimet doganore.
Megjithatë, Ministria thekson se angazhimi për të ndihmuar qytetarët mbetet maksimal. Në bashkëpunim me autoritetet e vendeve fqinje po shqyrtohen zgjidhje praktike për të përmirësuar qarkullimin dhe për të lehtësuar sa më shumë lëvizjen e shqiptarëve gjatë sezonit turistik.
Sipas ministrisë, situata pritet të përmirësohet në të ardhmen me zgjerimin e plotë të hapësirës Schengen edhe në këtë pjesë të rajonit, çka do të mundësonte kalim më të shpejtë dhe më të thjeshtë për udhëtarët.