Kryeministri Edi Rama ka mirëpritur këtë të hënë pjesëmarrësit nga 38 vende të botës në Konventën e Turizmit përmes një mesazhi ku tregon se Shqipëria nuk është ajo që lexojnë në media duke thënë se ka mbetur në të shkuarën krimi, droga, prostitucioni e mafia.
”Miq të ardhur në 38 vende të botës, ndihuni zotër në shtëpinë tonë. Shijoni sa të mundeni dallimin mes stereotipin e Shqipërisë në mediat tuaja dhe perceptimit të vetë shqisave tuaja për vendin krejt tjetër ku keni ardhur sot. Ky që shikoni është i vërteti ndërsa vendi i krimit, i mafies, drogës, prostitutave, plehrave, hajdutëve e lypsave është pjesërisht një vend të cilin ne e kemi lënë pas në të shkuarën dhe pjesërisht që e mban gjallë në retorikën e tyre dashakeqe dhe spekulante vendas dhe të huaj me gojën e tyre apo penën e tyre”, tha Rama.
Zurab Polikashvill, Sekretar i Përgjithshëm i Organizatës Botërore të Turizmit tha se bashkëpunimi është një pikë kyçe sa i përket turizmit, e ndërsa theksoi se fokusi do duhet të jenë angazhimi i të rinjve në këtë sektor.
