Kreu i KQZ-së: Janë 610 mijë vota, rinumërimi për Fierin dhe Tiranën zgjat deri në 20 ditë

Kryekomisioneri Ilirjan Celibashi foli në një konferencë për mediat lidhur me procesin e rinumërimit e votave për qarqet Tiranë dhe Fier. Celibashi tha se ky proces nis të hënën ose të martën e javës që vjen.

“Të hënën ose të martën e javës që vjen nis numërimi i votave të Tiranës dhe Fierit. Numërimi do të kryhet në Pallatin e Sportit “Fahrie Hoti”, kemi dashur në parkun Olimpik, por për shkak të rrethanave është parashikuar të zhvillohet një kampionat i basketbollit dhe kemi qenë të detyruar të shohim një opsion tjetër. Në total janë 61 201 vota për t’u numëruar. Do të jenë 24 grupe numërimi të përbërë nga dy anëtarë të stafit të KQZ. Do të duhen 18 deri 20 ditë për rinumërimin”, tha Celibashi, duke shtuar se shifra e kursyer nga kontrata me DHL është rreth 1.5 deri në 2 milionë euro.

“Kemi kursyer ndjeshëm nga kontrata me ofruesin e shërbimit postar për votën nga jashtë për diasporën,” deklaroi Celibashi, duke shtuar se KQZ nuk do të kërkojë fonde të tjera për këtë fazë të procesit zgjedhor.

Për të garantuar përmbylljen e rinumërimit brenda afateve, Celibashi njoftoi se gjithë administrata e KQZ-së do të jetë në punë pa ndërprerje, përfshirë edhe muajt korrik dhe gusht, ndërsa lejet vjetore të stafit janë anuluar.