“Kriza politike mund të nxisë edhe sulme terroriste”, alarmi i ekspertëve të sigurisë

Për ekspertët e sigurisë, kriza politike që ka përfshirë vendin mund të nxisë situata të caktuara destabiliteti, përfshirë edhe sulme terroriste, ndaj sipas tyre nuk duhet neglizhuar asnjë informacion nga partnerët e huaj.

“Shqipëria destabilizohet shpejt sepse nuk kemi struktura shtetërore të konsoliduara dhe nuk kemi politikanë të qetë që të marrin përsipër përgjegjësitë e tyre dhe të lëshojnë nga vetja”, thotë Ylli Zylla, ish-drejtor i SHIU-t.

“Destabilizim kemi parë në vende të ndryshme në forma nga më të ndryshmet, ndaj kjo nuk përjashtohet”, thotë Arjan Dyrmishi, studiues i sigurisë.

Por kush mund të jenë të interesuar për destabilitet në vend?

“Në radhë të parë shtetet rreth nesh, që nuk janë vende të NATO-s dhe as të BE-së që të jenë të interesuara që Shqipëria të ketë stabilitet. Pastaj është influenca ruse që është shtuar në biznes dhe administratë”, thotë Zylla.

“Për analogji, një vend i interesuar direkt për destabilitet në Shqipëri mund të jetë Maqedonia, për interes vetjak, pasi mund të mendojë se do të bjerë rreziku që ata ndjejnë prej nesh. E njëjta gjë është me Serbinë”, nënvizon Dyrmishi.

Sipas Dyrmishit, krimi i organizuar mund të përfitojë edhe nga zhvendosja e policisë në protesta apo trazira që mund të shkaktohen në vend.

“Nëse policia përqendrohet në menaxhimin e protestave apo rrëmujave, sigurisht që kjo do të jetë lehtësi për trafikantët, pasi do kenë mundësi që në një kohë të shkurtër të transportojnë sasitë e narkotikëve në vende të sigurta dhe kjo do të ketë pasoja për më vonë”, thotë Dyrmishi. / Top Channel