Kryeministri Rama për goditjen e Berishës: Akt i patolerueshëm, dënoj dhunën

Zyra e Kryeministrit Edi Rama, ka reaguar për goditjen fizike me grusht ndaj Sali Berishës në protestën e opozitës. Në një reagim për mediat, zyra njofton se Edi Rama dënon aktin e dhunës, duke e konsideruar të patolerueshëm.

“Kryeministri i Shqipërisë Edi Rama dënon pa asnjë ekuivok aktin e pajustifikueshëm e të patolerueshëm të dhunës mbi organizatorin dhe udhëheqësin e protestës së sotme! Dhuna s’ka qenë, s’është e s’do jetë kurrë një mjet për të adresuar çfarëdo çështje apo shqetësimi dhe kushdo e përdor këtë mjet duhet të përballet me të gjithë forcën e ligjit”, thuhet në reagimin e Kryeministrit të Shqipërisë.

I pyetur menjëherë nga gazetarët për këtë reagim, Sali Berisha tha se Edi Rama është organizatori i këtyre sulmeve.