Kuvendi zhvillon sot seancën plenare, ku në rendin e ditës janë parashikuar shqyrtimi i një projektligji dhe miratimi i disa projektrezolutave për veprimtarinë e institucioneve të pavarura gjatë vitit 2025.
Sipas rendit të ditës, seanca do të nisë me miratimin e procesverbalit të mbledhjes plenare të datës 18 qershor.
Më pas, deputetët do të shqyrtojnë projektligjin “Për kontrollet zyrtare dhe aktivitete të tjera zyrtare, të kryera për të garantuar zbatimin e legjislacionit për ushqimin dhe ushqimin për kafshë, të rregullimeve për shëndetin dhe mirëqenien e kafshëve, si dhe për shëndetin e bimëve e të produkteve për mbrojtjen e bimëve në Republikën e Shqipërisë”.
Në vijim, Kuvendi do të shqyrtojë projektrezolutën për vlerësimin e veprimtarisë së Komisionerit për Mbikëqyrjen e Shërbimit Civil për vitin 2025.
Po ashtu, në rend dite është edhe projektrezoluta për vlerësimin e veprimtarisë së Komisionerit për të Drejtën e Informimit dhe Mbrojtjen e të Dhënave Personale për vitin 2025.
Deputetët do të shqyrtojnë gjithashtu projektrezolutën për vlerësimin e veprimtarisë së Departamentit të Administratës Publike për vitin 2025.
Seanca do të vijojë me shqyrtimin e projektrezolutës për vlerësimin e veprimtarisë vjetore të Autoritetit të Konkurrencës për vitin 2025.
Në rendin e ditës është përfshirë edhe projektrezoluta për vlerësimin e veprimtarisë vjetore të Komisionit të Prokurimit Publik për vitin 2025.
Deputetët do të diskutojnë më tej projektrezolutën për vlerësimin e veprimtarisë së Autoritetit për Informimin mbi Dokumentet e Ish-Sigurimit të Shtetit për vitin 2025.
Po ashtu do të shqyrtohet projektrezoluta për vlerësimin e veprimtarisë së Institutit të Studimeve për Krimet dhe Pasojat e Komunizmit për vitin 2025.
Në rend dite është edhe projektrezoluta për vlerësimin e veprimtarisë së Agjencisë së Sigurimit të Depozitave për vitin 2025.
Të gjitha projektrezolutat do të prezantohen nga Komisioni për Nismat Qytetare, Bashkëpunimin dhe Mbikëqyrjen Institucionale dhe do të pasohen nga debat parlamentar, me kohëzgjatje deri në 120 minuta për secilin raport, të ndarë ndërmjet grupeve parlamentare dhe deputetëve jashtë grupeve.
Në përfundim të seancës plenare janë parashikuar diskutime për çështje jashtë rendit të ditës, në përputhje me Rregulloren e Kuvendit.
ATSH