Luan Rama: Duhet dekriminalizim i policisë

“Ideja e krijuar se LSI po prish koalicionin është vetëm një zhurmë”. Ishte kjo deklarata e numrit dy të Lëvizjes Socialiste për Integrim, Luan Rama i ftuar në Abc News.

Ndërsa mbrojti, ministrin e Mjedisit që vjen nga LSI, Rama tha se “reagimi i Lefter Kokës është reagim i një qytetari të përgjegjshëm për parregullsitë në Durrës”.

Në të njëjtën linjë, si dhe zyutarë të tjerë të LSI, Luan Rama ka bërë kritika për punën e Policisë së Shtetit.

“Policia nuk e ka kryer me sukses detyrën për parandalimin e kultivimit të kanabisit. Shqipëria është e mbushur me kanabis dhe këtë e ka pranuar edhe Kryeministri dhe ministra. Kultivimi i kanabisit në zonat e Shqipërisë nuk mund të bëhet pa pasur mbështetje nga policia. Mbjellja e sipërfaqeve të mëdha me kanabis nuk mund të bëhet pa prapavijë politike. Detyra e policisë nuk është që të korrë kanabisin, por të parandalojë kultivimin e tij”

Sipas nënkryetarit të LSI-së edhe policia duhet të dekriminalizohet. Sa i përket votimit elektronik, një kërkesë nga disa parti opozitare ai deklaroi se: “Tashmë nuk është e mundur që të bëhet votim elektronik për zgjedhjet e ardhshme, nuk ka kohë”.

Në lidhje me kërkesën e Ilir Metës, për mbledhjen e Këshillit të Sigurisë Kombëtare për çështjen e Klement Balilit, Luan Rama tha se: “Metës i është kërkuar nga SHBA që të ushtrojë ndikim maksimal për arrestimin e Klement Balilit. Balili nuk ka asnjë mburojë nga LSI, por deri tani ka pasur moskordinim mes institucioneve”