Manifestim në mbështetje të Ukrainës më 8 prill, Erion Veliaj fton qytetarët: Të lëmë politikën mënjanë

Më 8 prill, ora 12:00 në Tiranë do të zhvillohet një manifestim i madh në mbështetje të Ukrainës dhe popullsisë atje, e cila në këto momente po përballet me agresionin rus. Manifestimi do të nisë nga sheshi “Skënderbej” dhe do të vijojë deri të sheshi “Vëllezërit Frashëri”, dhe është thirrur nga komuniteti ukrainas në Tiranë.

Në këtë manifestim pritet që të marrin pjesë një numër i madh qytetarësh. Kreu i Bashkisë së Tiranës, Erion Veliaj, tha se do t’i bashkohet manifestimit, si edhe ftoi qytetarët që të bëhen pjesë e marshimit.

“Të premten në orën 12:00 do të mblidhemi të gjithë bashkë në sheshin “Skënderbej” – trupi diplomatik, organizata të shoqërisë civile, individë pa dallime partiake. Do të kemi një edhe përshëndetje nga kryetari i Bashkisë së Kievit, Klitchkov.

Marshimi do të nisë nga sheshi “Skënderbej” deri te “3 Vëllezërit Frashëri”, aty ku është ambasada e Ukrainës, për të dhënë disa mesazhe dhe për t’u bashkuar me korin e qyteteve më të mëdha të Evropës, për të bërë realitet atë që presidenti Zelensky tha në fjalën e tij në çmimet Grammy: “Na ndihmoni me gjithçka të mundeni, vetëm me heshtjen mos na ndihmoni, se heshtja nuk ndihmon asnjeri”. Heshtja përkundrazi të bën palë me fajtorin”, tha Veliaj.