Marku: Luftë totale derisa Rama të largohet nga pushteti. Basha nuk i njeh zgjedhjet

Drejtuesi politik i PD-së për zgjedhjet e 25 prillit në qarkun e Lezhës, kandidati që fitoi mandatin e deputetit, Mark Marku ka folur për mediat pas mbledhjes që zhvilloi bashkë me kolegët e tij me kreun e PD-së, Lulzim Basha.

Në një prononcim për gazetarët, Marku tha se ai është dakort që të zhvillohen protesta, gjë të cilën e ka kërkuar edhe gjatë mbledhjes, por që kryedemokrati Basha e ka kundërshtuar.

”Do të jetë një luftë totale. Do të jetë një luftë derisa Rama të largohet nga pushteti. Unë e kam thënë edhe më herët, duhet përdorur çdo gjë e mundshme për të mposhtur një regjim. Aty ku nuk ka zgjedhje të lira, u lind e drejta qytetarëve që të marrin çdo vendim sepse pushteti është ilegjitim. Kryetari e ka deklaruar se nuk do të njohë zgjedhjet e 25 prillit. Ata që kërkojnë dorëheqjen e Bashës janë shërbyer të Ramës. Me dashje pa dashje i shërbejnë atij. Nuk ka rëndësi a janë pjesë apo jo, mund t’i shërbejnë Ramës edhe duke qenë në PD, edhe pa dashje”,-tha Marku.