Mazhoranca konfirmon numrat në Kuvend. PDIU kundër emrave të PS për komisionin “Ad-Hoc”

Politikë E Enjte, 20 Maj 2021 21:56

S’ka surpriza, mazhoranca konfimon votat e saj në Kuvend teksa votoi me 87 vota pro dy projektvendimet për institucionet e vlerësimit të gjyqtarëve dhe prokurorëve shqiptarë (vetingut).

Konkretisht, PS, LSI dhe PDIU miratoi me 87 vota pro projektvendimet “Për procedurat parlamentare për funksionimin e komisioneve ad hoc dhe realizimin e procesit të votimit sipas ligjit “Për rivlerësimin kalimtar të gjyqtarëve dhe prokurorëve”.

Ndërsa, kryetarja e grupit parlamentar të PDIU-së Mesila Doda votoi kundër kandidaturave të Partisë Socialiste, Ulsi Manja dhe Vasilika Hysin.

Konferenca e Kryetarëve

Pak para nisjes së seancës së Kuvendit, ku do të diskutohet mbi ligjet e vettingut, është mbledhur Konferenca e Kryetarëve. Mësohet se Konferenca, në të cilin janë të pranishëm Vasilika Hysi, Ulsi Manja, Luan Rama si dhe Shpëtim Idrizi, do të diskutojë mbi propozimet e partive për Komisionin e Vetingut.

Ndërkohë, në seancë plenare do të diskutohet për ngritjen e komisionit ad hoc që do të verifikojë kandidatët e institucioneve të rivlerësimit të gjyqtarëve dhe prokurorëve shqiptarë. Rendi i ditës i seancës parashikon votimin e dy pr/vendimeve: “Për procedurat parlamentare për funksionimin e komisioneve ad hoc dhe realizimin e procesit të votimit sipas ligjit “Për rivlerësimin kalimtar të gjyqtarëve dhe prokurorëve” dhe të pr/vendimit “Për krijimin dhe përbërjen e komisionit ad hoc për verifikimin e kandidatëve për institucionet e rivlerësimit”.Institucionet e rivlerësimit përbëhen nga tre organe: nga Komisioni, nga Kolegji i Apelimit dhe nga dy Komisionerë publikë dhe zëvendësat e tyre, në total janë 27 anëtarë të këtyre strukturave. Por në kushtet kur opozita ka bojkotuar parlamentin, ngritja e komisionit ad hoc mbetet e bllokuar, pasi ka përbërje të barabartë anëtarësh, 3+3, nga maxhoranca dhe opozita. Kjo e pamundëson dhe vendimmarrjen e tij.

Opozita paralajmëroi të shtunën se nuk do të marrë pjesë në seancën e sotme, duke këmbëngulur në krijimin e një qeverie teknike, që do të mundësojë mbajtjen e zgjedhjeve të lira dhe të ndershme.