Merkel bisedë telefonike me Bashën: Vlerësim për lidershipin e treguar

Kancelarja e Gjermanisë Angela Merkel ka zhvilluar një bisedë telefonike me kryetarin e Partisë Demokratike Lulzim Basha, të cilin e ka vlerësuar për lidershipin e treguar për reformën në drejtësi.

Merkel falenderoi Bashë për kontributin e tij dhe lidershipin e treguar ne procesin e arritjes se konsensusit si një kontribut madhor për Shqipërinë dhe shqiptarët. Kancelarja gjermane shprehu bindjen se zbatimi me sukses i reformës në drejtësi do te jetë një ogur i mbarë për integrimin dhe të ardhmen Europiane të Shqipërisë dhe e siguroi Bashën për mbështetjen e saj të plotë dhe të gjithanshme.

Basha shprehu mirënjohjen e thellë për mbështetjen e jashtëzakonshme të Kancelares Merkel dhe Gjermanisë ndaj Shqipërisë, në sfidat e rrugëtimit të saj europian dhe në procesin e reformës në drejtësi dhe e garantoi atë se Partia Demokratike do të vazhdojë të jetë promotore e të gjitha proceseve reformuese duke u udhëhequr nga  parimet dhe vlerat Europiane.

Mazhoranca dhe opozita arritën marrëveshje sot për reformën në drejtësi, duke u pranuar dy çështjet që ndanin konsensusin, të kërkuara me ngulm nga Partia Demokratike.