Mësim online, Xhixho: Arsimi nuk është prioritet për ketë qeveri, sa më shumë bashkëpunim për ta kaluar këtë sfidë

Nënkryetarja e LSI-së, Erisa Xhixho ka reaguar për nisjen e vitit të ri akademik në universitete, i cili do të zhvillohet online deri në një afat të caktuar.

Xhixho shkruan se ky është një vit i pazakontë dhe sfidues si për studentët ashtu dhe për pedagogët.

“Arsimi nuk është prioritet për ketë qeveri ndaj dhe sjellja e saj e papërgjegjshme nuk habit askënd. Por drama financiare prek çdo ditë dhe me shumë çdo familje shqiptare, në këto kohë të errëta për vendin nën drejtimin e qeverisë më të papërgjegjshme që ka parë historia.” – shkruan Xhixho.

Postimi i plotë:

Sot fillon një vit i ri akademik shumë i pazakontë e sfidues për të gjithë studentët, pedagogët dhe në tërësi arsimin universitar.

Në kushtet e një pandemie të keqmenaxhuar dhe pa një strategji të qartë nga kjo qeveri, e cila vetëm 3 ditë përpara fillimit të mësimit lajmëron në papërgjeshmëri totale zhvillimin e mësimit online.

Duke vendosur studentët në vështirësi për të riorganizuar jetën e tyre studentore, shpenzimet e bëra tashmë për akomodimin e tyre në qytetet përkatëse, apo shpenzimet që duhet të kryejnë për të pasur mundësi në aksesin e mësimit online.

E gjitha kjo pa asnjë mbështetje financiare dhe pa asnjë plan nga qeveria.

Gjithashtu pedagogët që në kohë rekord do duhet të përshtaten me një sistem online i lajmëruar në momentet e fundit.

Arsimi nuk është prioritet për ketë qeveri ndaj dhe sjellja e saj e papërgjegjshme nuk habit askënd.

Por drama financiare prek çdo ditë dhe me shumë çdo familje shqiptare, në këto kohë të errëta për vendin nën drejtimin e qeverisë më të papërgjegjshme që ka parë historia.

Shpresoj me zemër në sa më shumë bashkëpunim për ta kaluar këtë sfidë të paprecedentë që kemi përpara.