Meta: Ja kur do ta dorëzoj teserën e LSI, do them të ma ruajnë mirë!

Kreu i LSI-së ende në detyrë, Ilir Meta, i cili u shpall një ditë më parë Presidenti i Ri i Republikës së Shqipërisë duket se ka qetësur gjithë mbështetësit e LSI-së, kur tha se do të jetë në krye të kësaj force politike gjatë fushatës zgjedhore të 18 qershorit.

Në një prononcim për mediat, Presidenti i sapozgjedhur deklaroi se teserën e LSI-së do ta dorëzojë në datën 23 korrik, një ditë para se të betohet për marrjen e detyrës së kryetarit të shtetit.
“Do respektoj Kushtetutën e vendit në mënyrë më të denjë. Më 24 korrik do të duhet të bëj betimin. Më 23 korrik do të dorëzoj dokumentin e LSI-së tek sekretari i përgjithshëm i LSI dhe do u them të ma ruajnë mirë atë dokument”, tha ai.

Po dje LSI-ja e drejtuar nga Meta ka mbledhur kryesinë për të përcaktuar listat për deputetë në zgjedhjet e 18 qershorit. Përveç konfirmimit të disa emrave, përfshi këtu ministra e deputetë aktualë të LSI-së, Meta theksoi se në listat e LSI do të futen të gjithë ata që kanë dëshirë.