Kreu i Federatës Shqiptare të Futbollit, Armando Duka ka zhvilluar sot një takim me ministren e Arsimit dhe Sportit, Evis Kushi. Temë e diskutimeve ishte financimi për futbollin, ndërsa Ligji i Sponsorizimeve, rihapja e Basteve Sportive dhe futbolli i femrave kanë qenë në fokus të krejt takimit.
Së bashku me Dukën në takim morën pjesë edhe presidentë nga Superligë. “Mundohemi të japim alternativat tona për rritjen e futbollit. Ligji i sponsorizimit ka efektet e veta për shtimin e sportistëve, rritjen e kushteve dhe zhvillimin e futbollit të femrave në Shqipëri.
Kërkojmë mbështetje financiare. Na u premtua nga ministrja se do vazhdojmë takime për këtë ligj, për t’i propozuar qeverisë një variant. Ligji i sponsorizimit, bastet sportive dhe një fond minimal për edukimin e fëmijëve, këto janë temat që u zhvilluan sot në takim.
Nga buxheti i ministrisë së Arsimit dhe Sportit, nuk ka pse përjashtohet FSHF me idenë se futbolli është i pasur. Duhen kushte dhe terrene sportive për moshat. Prej disa kohësh kemi projektin ‘Topi im’, ku japim topa falas për çdo ekip që luan futboll. Nga korriku i këtij viti do kemi edhe uniforma falas dhe kërkojmë ndihmë nga minsitria”, – tha Duka mes të tjerash.
Ministrja e Arsimit dhe Sportit, Evis Kushi, është përgjigjur menjëherë pas këtij takimi, teksa është kategorikisht kundër hapjes së sallave të bixhozit.
“I kam ndjekur vazhdimisht me shumë vëmendje diskutimet e fundit nga përfaqësues të ndryshëm të komunitetit të sportit në lidhje me çështjen e rihapjes së basteve sportive. Natyrisht që pretendimet e tyre për tregun e zi të basteve nuk janë pa bazë, madje ka pasur edhe operacione policore në këtë drejtim. Por ndërkohë ne jemi të vetëdijshëm që në të gjithë botën, madje edhe në vendet më të zhvilluara, problemi i tregut të zi digjital të basteve sportive është shumë i ndjeshëm,” – thekson Kushi në një status në rrjete sociale.
Ministrja shton se e përjashton kategorikisht përsëritjen e katrahurës së sallave të bixhozit, bingove e basteve, si dhe pasojat negative të këtij fenomeni social në familjet shqiptare, por ndërkohë do të dëgjojë më shumë për mundësinë e formalizimit të tregut digjital.