Në 22 bashki mbyllet numërimi i votës së 11 Majit, detaje sesa vota kanë marrë partitë
Kreu i Komisionit Shtetëror të Zgjedhjeve, Ilirjan Celibashi tregon se ka përfunduar procesi i numërimit të votave për subjektet në 22 bashki dhe renditi KZAZ ku janë hasur problematika. ”Është mbyllur procesi i numërimit për 22 bashki. Janë 24 KZAZ nga 93 që kanë përfunduar procesin dhe kanë vendosur që për shkak të lodhjes të fillojnë nesër me votat për kandidatët e listës së hapur. Kemi një ndërprerje në dy KZAZ të Fierit, me ndërhyrjen tonë ka rinisur puna. Në 2 KZAZ në Pustec dhe Devoll ka përfunduar procesi dhe për kandidatët”,-tha kryekomisioneri.
Librazhd
Është mbyllur procesi i numërimit në bashkinë e Librazhdit, ku janë numëruar 55 nga 55 kutitë. Partia Socialiste ka fituar në këtë bashki me 9253 vota, me një diferencë prej 3374 vota. Koalicioni opozitar PD-ASHM ka marrë 3374 vota, duke u renditur forca e dytë në këtë bashki. Në zgjedhjet e mëparshme të vitit 2021, selia rozë ka marrë 9952 vota, ndërsa PD 5181 vota.
Vau i Dejës
Numërimi edhe në Vaun e Dejës ka përfunduar, ku janë numëruar 53 nga 53 kuti dhe çdo gjë është vendosur. Forcë e parë në këtë bashki të Shkodrës është shpallur Partia Social-Demokrate me 5951 vota, ndërsa Partia Demokratike ka grumbulluar 4698. Në vendin e tretë është renditur Partia Socialiste me 2482 vota. Vau i Dejës është bashkia e parë në të cilën fituese nuk është shpallur as Partia Demokratike e as Partia Socialiste.
Finiq
Është mbyllur votimi edhe në Bashkinë e Finiqit. Gjithsej kanë qenë 4125 persona që votuan të dielën e 11 Majit. Shumicën e votave i ka marrë Partia Socialiste, duke ngjyrosur me rozë në këtë mënyrë edhe një tjetër bashki. Partia Socialiste-2511 vota, Partia Demokratike-1166 vota. Partia Socialdemokrate-219 vota. Nisma Shqipëria Bëhet-171 vota, Lëvizja Bashkë-17 vota, Partia Mundësia-12 vota, Koalicioni Euroatlantik-11 vota dhe Lëvizja Atdheu-8 vota.
Shijak
Mbyllet numërimi në Shijak, duke shpallur triumfues kampin rozë. Partia Socialiste ka marrë rreth 2 mijë vota më shumë se Partia Demokratike. Menjëherë pas numërimit të votës së fundit, socialistët kanë shpërthyer në festë. PS ka marrë 7118 vota, ndërsa PD ka marrë 5266 vota, ndërkohë Mundësia ka marrë 229 vota, ndërsa
Nisma Shqipëria Bëhet mori 185.
