“Neomalësorja” Marjana Koçeku, divorci politik i deputetes shoqërohet me hapa institucionalë

Zhvillimet brenda kampit socialist dhe Kuvendit të Shqipërisë kanë marrë një rrjedhë të re pas vendimit radikal të deputetes, Marjana Koçeku, për të braktisur Grupin Parlamentar të Partisë Socialiste. Ky divorc politik po shoqërohet me hapa institucionalë që po zhveshin deputeten nga pozicionet e rëndësishme që mbante në emër të mazhorancës.
Pas deklaratës së saj për të vepruar si deputete e pavarur, ka ardhur edhe lëvizja e parë zyrtare brenda strukturave të Kuvendit. Kryetari i Parlamentit, Niko Peleshi, konfirmoi ndryshimet e fundit ku Koçeku është larguar zyrtarisht nga pozicioni i anëtares në Komitetin Parlamentar për Stabilizim-Asociim (KPSA), një organizëm i rëndësishëm i urave diplomatike dhe integruese mes Shqipërisë dhe Bashkimit Evropian.
“Në komitetit parlamentar për stabilizim asocimin, deputetja Marjana Koçeku, largohet si anëtare dhe caktohet deputeti Erion Malaj,” njoftoi Peleshi nga dita e Kuvendit.
Ky zëvendësim tregon reagimin e menjëhershëm të strukturave të PS-së për të riorganizuar përfaqësimin e saj në komisionet kyçe pas humbjes së një prej mandateve të saj në veri.
Marjana Koçeku, e njohur gjerësisht përpara jetës politike me emrin “Neomalësorja”, ishte një nga figurat e reja të përzgjedhura dhe të reklamuara fort nga vetë kryeministri Edi Rama për zgjedhjet parlamentare të 11 majit 2025. Ajo kryesoi listën e mbyllur të socialistëve në Qarkun e Shkodrës, duke siguruar mandatin në mënyrë të drejtpërdrejtë.
Megjithatë, pas vetëm 9 muajsh në parlament, Koçeku zgjodhi të distancohej nga mazhoranca pikërisht në një moment kulmor tensionesh politike, duke iu bashkuar kauzës së qytetarëve në bulevardin “Dëshmorët e Kombit” që kërkojnë dorëheqjen e qeverisë. Përmes një letre të hapur, ajo e quajti sistemin aktual “të ndërtuar mbi frikë dhe servilizëm”, duke shprehur se idealet e saj nuk përkonin më me shtëpinë politike që e mandatoi.
Akti i Koçekut ka ngritur një valë të madhe reagimesh dhe zemërimi brenda eksponentëve të lartë të Partisë Socialiste. Pasi e cilësuan lëvizjen e saj si një “shkelje besimi” dhe keqpërdorim të votave të socialistëve shkodranë, figura të rëndësishme si Taulant Balla kanë dalë me thirrje të prera që ajo të dorëzojë mandatin e deputetes.
Koçeku nuk u votua si emër nominal në listë të hapur, por erdhi në Kuvend falë renditjes që i bëri partia në krye të listës së mbyllur. Për rrjedhojë, sipas tyre, mandati i përket strukturës dhe logos së partisë.
Deputetja ka refuzuar dorëzimin e karriges parlamentare, duke u shprehur se tashmë zëri i protestuesve dhe i qytetarëve të thjeshtë ka një mandat të mirëfilltë e të pavarur brenda sallës së Kuvendit.
Ndërsa situata mbetet e nxehtë, largimi i saj nga komitetet ndërkombëtare shënon vetëm fillimin e një izolimi institucional që mazhoranca pritet t’i bëjë ish-deputetes së saj brenda jetës parlamentare.
Albert Vataj