Ngrihet kuratoriumi për sigurinë rrugore, ministri Hoxha: Çdo aksident i shmangur është një jetë e shpëtuar

Ministri i Brendshëm, Ervin Hoxha gjatë fjalës në aktivitetin për prezantimin e Kuratoriumit (Bordit) për Sigurinë Rrugore, tha se qeveria shqiptare e ka në fokus sigurinë rrugore. Për të fuqizimi i Policisë përmes edhe teknologjisë bën një monitorim në të gjitha akset e vendit. Hoxha ndau edhe rezultatet krahasuese të jetëve të humbura si pasojë e aksidenteve rrugore, mjet-individ nga viti 2012 e deri vitin e kaluar.

”Në vitin 2012 numri i jetëve të humbura ishte 334, në 2024-ën ishte 175 viktima në aksidente. Krahasimet me të vdekurit nuk duhet të bëhen, por këto janë fakte dhe tregojnë që një dukuri që ndodh në rrugët tona, si edhe një standard që shtetet e BE-së e kanë kaluar. Aksidentet me pasojë vdekjen mjet me këmbësor ku ne sot kemi rreth 35% të rasteve që përfshihen në këto aksidente, na detyron që të punojmë më shumë në këtë fushë”, shtoi ai.

Ministri nënvizoi faktin se çdo aksident i shmangur është një jetë e shpëtuar. Ndaj dhe për të qeveria shqiptare ka nënshkruar marrëveshjen e huamarrjes me Abu-Dabin që i hap rrugë një projekti ambicioz i cili do të shtrihet në të gjithë vendin.

”Rrugët interurbane do të monitorohen nëpërmjet kamerave, shpejtësia do të matet nga radarët, por edhe targat do të jenë të lexuara nëpërmjet kësaj teknologjie. Ne do të hapim edhe Qendrën e Menaxhimit të Trafikut kombëtar, ku do të jenë të përfshirë shumë punonjës policie që do të jenë menaxherët e parë të kësaj praktike moderne dhe evropiane. Edukimi dhe ndërgjegjësimi i qytetarëve është një tjetër element i rëndësishëm.

Siguria fillon nga sjellja jonë në trafikun rrugor. Si edhe forcimi i ligjit dhe rritja e përgjegjshmërisë institucionale, ku Policia Rrugore në bashkëpunim me autoritetet e tjera vijojnë forcimin e koordinimit nëpërmjet Kodit Rrugor dhe trajnimet e vazhdueshme në përdorimin e teknologjisë. Misioni është ndërgjegjësimi për sigurinë në trafik përmes informimit, edukimit dhe frymëzimit, duke ndikuar në përmirësimin e kuadrit ligjor, zbatimit praktik dhe sjelljes në rrugë”,-tha më tej ministri Hoxha.