Një këshilltar largohet nga PSD-ja e Tom Doshit dhe i bashkohet PS-së

Një zhvillim i ri politik është shënuar në Këshillin Bashkiak të Shkodrës. Gjovalin Ndoj, anëtar i këtij këshilli i zgjedhur nën siglën e Partisë Socialdemokrate (PSD), ka njoftuar largimin nga kjo forcë politike dhe ka shpallur publikisht kalimin e tij në radhët e Partisë Socialiste (PS).

Në një deklaratë për mediat, Ndoj theksoi se vendimi i tij vjen pas një vlerësimi të punës së deritanishme të Kryetarit të Bashkisë Shkodër, Benet Beci, të cilin ai e konsideroi një model të angazhimit dhe transformimit për qytetin.

“Mbështetja ime shkon për Partinë Socialiste dhe veçanërisht për Kryetarin e Bashkisë, z. Benet Beci, i cili po dëshmon se Shkodra mund të ecë përpara me punë të mirëfilltë dhe përkushtim ndaj qytetarëve,” u shpreh Ndoj.

Ky zhvillim pritet të ndikojë në balancat politike brenda Këshillit Bashkiak, duke shtuar mbështetjen për mazhorancën vendore të drejtuar nga PS.