“Nuk ka më polici shteti”, PD reagon ashpër: Taulant Balla e deklaroi sot si Polici Private të PS-së

Prej sot, Policia e Shtetit nuk ekziston më. Ajo është Policia Private e Partisë Socialiste. Kështu deklaron Partia Demokratike përmes ish-deputetit të Elbasanit, Endri Hasa.

“Pjesëmarrja e Sekretarit të Përgjithshëm të Partisë Socialiste, Taulant Balla, në një aktivitet policor në Elbasan, bashkë me gjithë drejtuesit e partisë lokale, e ka zhbërë konceptin “policia e shtetit”.
Në grahmat e fundit të pushtetit, ata po e bëjnë gati policinë ta përdorin për fushatën elektorale për llogari të Edi Ramës.
Pjesëmarrja e Taulant Ballës është edhe një mesazh i dëshpëruar për krimit, duke e shfaqur veten si shpëtimtarin e “çunave problematike”.

• Lajmi i keq është se policia po keqpërdoret si polici private zgjedhjesh, që nuk I shërben qyterarëve por një partie politike.
• Lajmi I mirë është se kanë mbetur vetëm 7 muaj nga shkrirja në një e policisë, e krimit dhe e partisë shtet”, shprehet ish-deputeti demokrat, Endri Hasa në reagimin e tij përmes rrjeteve sociale.

Deputeti i Partisë Socialiste, Taulant Balla ka mbajtur një fjalim para efektivëve në ceremoninë e prezantimit të Forcave Shqiponja në Drejtorinë Vendore të Policisë në Elbasan. Numri 2 i Partisë Socialiste, foli për krimin, për politikën dhe kazanin, duke e kthyer në një miting politik. Thashethemet në korridoret e PS, e bëjnë Taulant Ballën si ministrin e ardhshëm të Ministrisë së Brendshme.