PD thirrje Ilir Metës: Qëndro larg selisë blu, je pjesë e trekëndëshit bashkë me Ramën dhe Berishën

Partia Demokratike përmes një qëndrimi zyrtar, i kërkon presidentit Ilir Meta që të mos përfshihet në situatën ku ndodhet PD-ja, kjo pasi e quan pjesë të trekëndëshit Rama-Meta-Berisha. ”Trekëndëshin Berisha-Rama-Meta e bashkon një hall i madh, por që nuk është as halli i Partisë Demokratike dhe as halli i qytetarëve shqiptarë”. Reagimi i PD vjen një ditë pasi kreu i shtetit bëri përgjegjës Lulzim Bashën për situatën.

Deklarata e plotë

Ilir Meta dhe njerëzit e tij duhet të qëndrojnë larg selisë së Partisë Demokratike. Koha kur PD përdorej si mburojë nga Ilir Meta ka përfunduar në 9 Shtator, kur PD u distancua nga Sali Berisha.

Ndërhyrja e Presidentit të Republikës, njëlloj si Edi Rama, në një debat të brendshëm në Partinë Demokratike, tregon atë që kemi thënë që në nisje, që trekëndëshin Berisha-Rama-Meta e bashkon një hall i madh, por që nuk është as halli i Partisë Demokratike dhe as halli i qytetarëve shqiptarë.

Pastrimi i llumit të tranzicionit është mision për çdo demokrat, për çdo qytetar shqiptar dhe është e vetmja rrugë që Shqipëria të ecë përpara drejt të ardhmes europiane.