Përplasja me Berishën. Deputetja e PD: Të tërheqim zvarrë Taulant Ballën!

Një deklaratë e ashpër dhe thirrje për dhunë është bërë sot kundër një prej deputetëve të Partisë Socialiste. Deputetja e Partisë Demokratike, Arbjola Halimi propozon tërheqjen zvarrë të Taulant Ballës.

Propozimi i saj është bërë në Facebook, ku kërkon që të ngrihet një aleancë për të ndëshkuar deputetin Balla. Halimi thotë se ajo është e para që futet në këtë aleancë. “Aleanca për të tërhequr zvarrë Taulant Ballën për gjuhën enveriste të përdorur në Kuvend. Unë jam e para”,- shkruan deputetja e PD-së.

Komenti ne Facebook i deputetes Halimi

Në komentin e saj ka dhe njerëz që mbështesin idenë dhe rreshtohen në aleancën e re që ka si synim linçimin e një deputeti. Deklarata të forta janë bërë shpesh nga deputetët e të gjithë kampeve, por thirrje për sulme fizike personale nuk janë të zakonshme. Ajo që është shqetësuese ka të bëjë me faktin se një deklaratë e tillë më gjuhë të ashpër nuk bëhet nga një militant i zakonshëm, por nga një ligjvënëse e Parlamentit.

Reagimi i deputetes Halimi ka të bëjë më qëndrimin e Taulant Ballës si Kryetar i Komisionit Hetimor për Çështjen CEZ. Balla dërgoi policinë në banesën e ish-kryeministrit Sali Berisha për ta marrë atë me forcë për të dëshmuar në komision.

Për t’i shpëtuar sikletit të shoqërimit me polici Berisha u paraqit vetë të hënën në seancën e Komisionit. Gjatë debatit pati replika të ashpra mes Berishës dhe Taulant Ballës. Komisioni i CEZ ishte i vetmi rast në karrierën politike të Sali Berishës, ku ky i fundit u thirr në cilësinë e dëshmitarit dhe duhet t’i përgjigjej pyetjeve të Ballës dhe deputetëve të PS.

Një zhvillim i tillë i ngjarjeve është cilësuar si poshtërim politik për Sali Berishën. Vetë Berisha shprehu qëndrimin e tij për thyerje të rregullores së Parlamentit. Ndërsa Balla tha se e “morëm si Çeçon në komision”.

Asnjë nga deputetë e tjerë të PD-së në komision nuk e mori në mbrojtje Berishë. Siç duket thirrja si dëshmitar, kërcënimi me polici dhe akuzat ndaj Berishës kanë bërë që deputetët e tjerë të djathtë të marrin në mbrojtje liderin historik. Abjola Halimi është vënë në para në listë për të sulmuar Taulant Ballën edhe fizikisht.