Përurohet në kryeqytet shkolla e re “Kiço Blushi”

Aktualitet Politikë E Martë, 24 Janar 2023 11:15

“Në Ditën Ndërkombëtare të Arsimit përurojmë dy shkolla të reja: “Kiço Blushi” dhe “Sevasti Qiriazi”, me klasa moderne dhe terrene sportive, që mund të përdoren pas mësimit edhe nga komuniteti i zonës.

Krenar që kemi bërë kaq shumë punë për fëmijët, me godina të tilla që do të mbesin këtu për gjeneratën tjetër”- shkruan Erion Veliaj në facebook.

Kiço Blushi ishte njeri i letrave, intelektual i angazhuar për problemet e demokracisë dhe kulturës në Shqipëri.

Ai ishte për shumë vite anëtar i Bordit të gazetës KOHA JONË, së bashku me Dritëro Agollin e disa personalitete shqiptare të kohës.

Emri i tij në shkollen e re në kryeqytet nderon këdo qytetar të Tiranës.

“Zona e ‘Bregut të Lumit’ cilësohej si një realitet jashtë vëmendjes, një zonë e ndërmjetme mes lumit dhe urbanistikës së Tiranës. Çdo gjë përtej Unazës, përtej rrugës ‘5 Maji’, konsiderohej një zonë pa zot, ku ndërtohej kuturu, ku nuk kishte urbanistikë, kanalizime. I kemi harruar këto! E kemi harruar se lumi përmbyste shtëpitë. Tashmë zona e ‘Bregut të Lumit’, me investimet që kemi bërë, duke filluar nga shkolla e parë që ndërtuam, ‘Ardian Klosi’, apo gjithë lagjja e re që po zhvillohet, hapja e aksit të rrugës ‘5 Maji’, po kthehet në një nga zonat më të zhvilluara të Tiranës. Me autostradën që do të kalojë nga ana tjetër e lumit dhe 4 ura, që do e lidhin me zonën e Paskuqanit dhe Kamzës, do e bëjnë këtë zonë portën hyrëse të Tiranës. Do jetë zona ku do ketë më shumë rritje të vlerës së pronës se te 27 njësitë e Tiranës”, tha Veliaj.

Duke folur për emërtimin e dy shkollave të reja, kryebashkiaku tha se Kiço Blushi dhe Sevasti Qiriazi janë dy personalitete.