Presidenti i Shqipërisë, Ilir Meta ka dekretuar qeverinë ”Rama 3”. Kreu i shtetit ia ka nisur dekretet Kuvendit të Shqipërisë.
Po ashtu vendimi i Presidentit vjen një ditë pasi Prokuroria e Përgjithshme i ktheu përgjigje në lidhje me verifikimin e ministrave, duke thënë se për asnjë nga 16 emrat e propozuar nga Edi Rama nuk ka të regjistruar ndonjë hetim penal nga prokuroritë e vendit.
Me mandatimin e kryeministrit dhe dekretimin e qeverisë së re nga presidenti, Rama tashmë i paraqet për miratim Kuvendit, brenda 10 ditëve, programin qeverisës dhe emrat e ministrave parlamentit.
Dekretet e miratuara nga Presidenti kalohen sërish nga Kuvendi në një afat 10 ditë. Para fillimit të detyrës, Kryeministri, zëvendëskryeministri dhe ministrat do të betohen para Presidentit.
Kabineti i ri qeveritar
Kryeministër-Edi Rama
Zëvendëskryeministri-Arben Ahmetaj
Ministri për Punët e Jashtme dhe Europën-Olta Xhaçka
Ministri i Mbrojtjes-Niko Peleshi
Ministri i Drejtësisë-Ulsi Manja
Ministri i Punëve të Brendshme-Bledi Çuçi
Ministri i Financave-Delina Ibrahimi
Ministri për Infrastrukturën-Belinda Balluku
Ministri i Shëndetësisë-Ogerta Manastirliu
Ministri i Arsimit-Evis Kushi
Ministri i Kulturës-Elva Margariti
Ministria e Bujqësisë-Frida Krifca
Ministria e Turizmit dhe Mjedisit-Mirela Kumbaro
Qeveria e re do ketë katër ministra shteti:
Elisa Spiropali-ministre për Marrëdhëniet me Parlamentin
Edona Bilali-ministre e Shtetit për Mbrojtjen e Sipërmarrjes
Bora Muzhaqi-ministre e Shtetit për Rininë dhe Fëmijët
Milva Ekonomi-ministre e Shtetit për Standardet dhe Shërbimet