Presidenti Meta thirrje urgjente qeverisë: Sistemi shëndetësor rrezikon të zhytet në kolaps. Rimbursoni ata që kurohen në shtëpi

Presidenti Ilir Meta ka reaguar për situatën e rëndë të pandemisë së koroanavirusit në vend. Në një mesazh publik, kreu i shtetit shprehet se duhet të miratohet pa vonesë një plan koordinimi i qartë dhe transparent me sistemin privat, për të bashkuar të gjitha energjitë dhe kapacitet e duhura.

Presidenti bën thirrje për rritjen e numrit të testimeve dhe rimbursimin e shpenzimeve që qytetarët po kryejnë për kurimin e sëmundjes në banesë.

Mesazhi i plotë i kreut të shtetit:

Në mungesë të një plani dhe strategjie konkrete për të përballuar përhapjen masive të pandemisë COVID-19, të reflektuar me shtim çdo ditë të numrit të qytetarëve të infektuar, fatkeqësisht edhe të humbjeve në jetë, sistemi shëndetësor rrezikon të zhytet në kolaps të thellë, me pasoja tepër të rënda për shëndetin e qytetarëve.

Në këto kushte, është tepër e domosdoshme të shtohet masivisht numri i testimeve, si një mjet efikas për gjurmimin dhe trajtimin në kohë të qytetarëve të prekur nga COVID-19.

Për këtë qëllim të miratohet pa vonesë edhe një plan koordinimi i qartë dhe transparent me sistemin privat, për të bashkuar të gjitha energjitë dhe kapacitet e duhura.

Thelbësore gjithashtu është vënia në efiçencë të plotë të mjekut të familjes, shtimi i stafit mjekësor dhe atij mbështetës, si dhe planifikimi i buxhetit të duhur në ndihmë të tyre.

I bëj thirrje Qeverisë të bëjë çdo përpjekje për rimbursimin e plotë të shpenzimeve, veçanërisht të pacientëve që mjekohen në banesë, të familjeve me ndihmë ekonomike dhe të pensionistëve.