Prishja e pallatit te ”Myslym Keta”, Meta: Qëndroi në këmbë për tre vjet pas tërmetit. Më 14 maj u pritet bileta pa kthim

Kreu i Partisë së Lirisë, Ilir Meta në mbledhjen e kësaj të mërkure të Komitetit Drejtues të partisë, ka komentuar prishjen e pallatit te rruga ”Myslym Keta”.

Meta tha se ai pallat kishte qëndruar për tre vite në këmbë ndonëse ishte dëmtuar nga tërmeti, por bashkia e prishi një orë e më parë pa lejuar as banorët që të marrin plaçkat e tyre. Për të i vetmi nxitim i tyre ishte që të prishnin këtë pallat pasi e dinë se më 14 maj, ditën e zgjedhjeve lokale, do u pritet bileta pa kthim.

“U sulmuan me tërbim edhe pallati i fundit të rruga Myslym Keta. Banditët nuk prisnin dot ti linin banorët të mblidhnin plaçkat, pale të prisnin vendimin e gjykatës. Pallati qëndroi në këmbë tre vjet pas tërmetit, tani horrave të bashkisë nuk u priste puna asnjë orë, sepse e dinë që 14 maji është bileta pa kthim për ta. IKMT është kthyer në kamxhikun drejtues të Ramës ndaj të pambrojturve”, tha Meta.