Programi për Arsimin, Xhixho: Sepse arsimi është arma më e mirë që kemi për të përmirësuar botën

LSI ka në programin e saj ambicioz elementet kryesore që do sjellin ndryshimin urgjent për të cilin ka nevojë arsimi në vend, ndryshim që presin sot prindërit për fëmijët e tyre dhe të rinjtë, për të ndërtuar këtu karrierën e të ardhmen.

Po ndaj me ju shkurt pikat kryesore të programit të LSI-së për arsimin:

1. Rritja e buxhetit për arsimin në 5% të PBB, nga të cilat 3% t’i dedikohen arsimit parauniversitar, 1.5% arsimit të lartë dhe 0.5% kërkimit shkencor.

2. Vendosja e taksës së solidaritetit për arsimin në masën 1% të fitimit të 200 kompanive më të mëdha.

3. Ligji për Arsimin e Lartë do të shqyrtohet në bashkëpunim të ngushtë me trupën akademike të universiteteve shqiptare me qëllim rritjen e cilësisë dhe garantimin e autonomisë.

4. Orientim i temave studimore në Programet Master dhe Doktoraturë (PhD) në çështje konkrete të zhvillimit të ekonomisë dhe forcimin e sistemit të bursave shtetërore sipas sektorëve prioritarë me qëllim afrimin e studentëve me kërkesat e tregut të punës.

5. Përfshirje e praktikave të detyruara të punës (internship) në Bachelor dhe Master, duke përshtatur kurrikulat e një ose dy viteve të fundit për studentë të veçantë, për t’ju përgjigjur nevojave të tregut të punës (mbi bazë marrëveshjesh qeveri-biznes-shkollë).

6. Përgjysmim i shpenzimeve të studentëve duke ulur tarifat e studimit e njëkohësisht garantim i një paketë që siguron uljen e kostos së jetesës së studentëve ku përfshihen banimi, ushqimi, transporti e mjetet mësimore.

Duke besuar se arsimi është arma më e mirë që kemi për të përmirësuar botën, së bashku do ta bëjmë realitet këtë program, për të rinjtë sot dhe të ardhmen e brezave që do vijnë”, shprehet Xhixho.