Protesta, Berisha flet për programin e PD: Jemi forca që do të rrëzojë dy diktatura

Në protestën qytetare të PD-së para Kryeministrisë, Sali Berisha e nisi me përulje dhe falënderim vëllazëror për të gjithë ata që i janë bashkuar opozitës. “Nga hiri u ngritëm si feniksi”, tha Berisha. Ai tha se asgjë nuk e mposht këtë forcë politike, duke theksuar se historia e deshi të rrëzojë dy diktatura. Berisha gjatë fjalës tha se opozita dhe PD është e pamposhtur. Për të PD është ngritur në këmbë megjithëse sipas tij, ndaj opozitës janë vënë prokuroria dhe gjykata.

”E nis fjalën time me një përulje para jush. Me një falënderim vëllazëror dhe me përgëzimet e mia për të gjithë ju, demokratët dhe opozitarët. Në pak kohë ne kemi bërë shumë. Le të kthehemi pak vetëm një vit më parë, në shkurtin e kaluar. Ne ishim këtu në shesh në protestën ku lideri i opozitës ishte i arrestuar në kundërshtim me ligjin dhe Kushtetutën. Dhe unë fjalën tim e mbajta nga një ekran televiziv, i burgosur politik. Por në atë protestë ne hodhëm themelet e çdo fitoreje që meritojmë dhe që do kemi. Në atë protestë u dëshmuam shqiptarëve se nga hiri u ngritëm si feniksi, dhe ata që menduan se do na mposhtin dështuan me turp. Ne jemi të pamposhtur sepse ne u bashkuam. Sepse në mbrojmë kauzë të drejtë. Sepse mbrojmë vlerat më të arrira të njeriut, interesin kombëtar, dinjitetin, familjen, kombin”,-tha Berisha.

Lideri i opozitës nënvizoi edhe se kjo e sotmja është Partia Demokratike, e cila e bashkuar do të rrëzojë për të dytën herë një diktaturë në Shqipëri. ”Vijmë sot këtu si opozitë e të pamundurës, e bërë të mundur. Si PD që të pamundurat i bën të mundura. Sot kemi vulë dhe flamur dhe jemi më të bashkuar se kurrë. Sot jemi forca politike më e përkrahur. Sot jemi në këmbë, më të vendosur se kurrë në betejë me diktaturën. Historia e deshi që ne të jemi e vetmja forcë politike që përmbys dy diktatura njëra pas tjetrës. Diktaturën staliniste dhe narkodiktaturën e bastardit të bllokut komunist, Edi Ramës”.

Nga ana tjetër, Berisha tregoi edhe pjesë të programit që do të prezantojë PD për zgjedhjet e 11 majit. ”Pas zgjedhjeve do ta paketojmë Ramën tek McGonigal, të bëjë dënimin pastaj të kthehet. Miqtë e mi, ku nuk është një miting elektoral. Por ne duhet të ndihemi krenar me programin tonë. Edi Ramën e ka tmerruar programi ynë. E ka shfazuar programi ynë. Ne në programin tonë kemi shembur piramidën e tij të mashtrimeve, kemi faktuar vjedhjet që i janë bërë shqiptarëve. Rama i pashpirtë, i la pensionistët në gjendjen më të mjerë”.