Kryeministri Edi Rama deklaroi sot se çdo formë proteste është e mirëseardhur, sidomos në një vend ku opozita e ka braktisur përfundimisht detyrën.
Në një bashkëbisedim me pensionistë, Rama siguroi se e drejta e njerëzve për protestë është e paprekshme.
“Çdo formë proteste dhe sidomos ato format kreative, janë të mirëseardhura, sepse janë forma që ty, që je në krye, të bëjnë të mendosh, të sfidojnë. Dhe në një vend ku opozita e ka braktisur përfundimisht detyrën, është e mirëpritur një formë e tillë që e vë qeverinë në mendime dhe që e vë nën një presion që vjen nga poshtë”, u shpreh Rama.
Por në protestë, sipas tij, janë edhe ata që financohen nga aktorë që janë armiq ose jo dashamirës.
“Ka disa lloj aktorësh. Duhet ta dinë kur dikush që del në protestë dhe premton Shqipërinë e lirë dhe të re e ka karrierën e vet të karakterizuar nga vepra penale. Duhet ta dinë kur dikush bën si i pavarur dhe si flamengo dhe, ndërkohë, ka dalë nga hundët e bufit të kënetës. Duhet t’i dinë të gjitha njerëzit”, shtoi Rama.
Ndërkohë, kryeministri siguroi se “problematikës së protestës ne do t’i drejtohemi në mënyrë të strukturuar, jo me fjalë, dhe do të duhet të bëjmë një reflektim serioz”.
“Kjo nuk diskutohet, sepse kemi bërë shumë gjëra, por koha sot ka pritshmëri më të larta. Dalin në protestë njerëz që kanë të ardhura shumë të larta. Për shembull, punonjës bankash. Punonjësit e bankave paguhen më shumë se ministrat, dalin në protestë”, u shpreh Rama.
Nga ana tjetër, kryeministri theksoi se “ne jemi sot në një pozicion ku realisht duhet të jemi krenarë edhe për mënyrën se si protestohet, edhe për faktin që gjithkush në Shqipëri ka të drejtën të mendojë, të flasë ç’të dojë”.
“Kjo protestë u tregon të gjithë atyre hienave, çakejve, sorrave dhe korbave, se ashtu janë, që rrinë dhe rrokanisin kokën e miletit çdo natë, që këtu është demokraci. Këtu nuk ka autokraci, këtu nuk ka rrahje protestuesish paqësorë. Kur ti shkon atje një grup për të ushtruar presion fizik mbi deputetët, aty pastaj jemi në territore të tjera. Po ata që bëjnë këtë nuk kanë lidhje me flamingot. Flamingot janë paqësorë. Dallimi midis flamingove dhe sorrave e korbave është se flamingot janë paqësorë, ndërkohë që sorrat dhe korbat janë të dhunshëm”, u shpreh Rama.
ATSH