Rama e quajti Chris LaCivita punëtor të Trump, Berisha: Zgjodhi PD-në për të vijuar betejën kundër Sorosit

Sali Berisha ka reaguar pas deklaratës së kryeministrit Edi Rama, i cili e quajti konsulentin e PD-së për zgjedhje punëtor të Trump, teksa shigjetonte opozitën. Në një konferencë me gazetarët, Berisha theksoi se Chris LaCivita është njëkohësisht kryetar i komitetit kombëtar të Partisë Republikane të Donald Trump.

”Ai personi, të cilin Edi Rama e quajti punëtor i Donald Trump sikur të ishte kopshtar apo lulishtar në Mar-A-Lago është njëkohësisht kryetar i komitetit kombëtar të Partisë Republikane të Donald Trump. Dhe ai foli aty në cilësinë e bashkëkryetarit të menaxhimit të fushatës më të suksesshme në histori, por foli edhe në cilësinë e kryetarit të Komitetit Kombëtar Republikan”,-tha Berisha.

Nga ana tjetër, Berisha theksoi se Chris LaCivita, zgjodhi PD-në për të vazhduar betejën kundër Sorosit dhe ekstremit të majtë të tij. Berisha thekson se vendimi i tij ishte një akt politik. ”Çdo shqiptar duhet ta ketë të qartë se Chris LaCivita në kërkesën planetare që ekziston, në qindra kërkesa nga i gjithë planeti, që ekzistojnë për të bashkëpunuar me të, ai fisnikërisht zgjodhi Partinë Demokratike të Shqipërisë. Për të Edi Rama është një kukull e Xhorxh Sorosit. Erdhi këtu për të vazhduar betejën që fitoi në SHBA, kundër Sorosit dhe ekstremit të majtë të tij. Pra, ishte një akt kryekëput politik pasi i prenë kokën gjarprit në Uashington, duhet t’ia presin tentakulat kudo, dhe në Shqipëri ato ishin dhe janë më të zhvilluara se në asnjë vend tjetër”.