”Pas më shumë se 30 vitesh, kanë rifilluar gërmimet arkeologjike në Kalanë e Gjirokastrës”. Lajmin e ndan kryeministri Edi Rama. Përmes një postimi në Facebook, kreu i qeverisë shkruan që synimi është zbardhja e fazave të hershme të ndërtimit. Kalaja e Gjirokastrës është atraksioni kryesor i qytetit të gurtë falë vlerave historike dhe arkitektonike.
”Instituti Kombëtar i Trashëgimisë Kulturore dhe DRTK Gjirokastër janë në ditën e tretë të punimeve, të cilat do të vijojnë gjatë gjithë korrikut. Synimi është zbardhja e fazave të hershme të ndërtimit, me zbulimet e para që përfshijnë gjurmë të një kulle nga antikiteti i vonë (shek. V–VI pas Kr.) dhe materiale të tjera të rëndësishme, që dokumentohen për herë të parë”, theksoi Rama.
Kalaja e Gjirokastrës e vendosur mbi një kodër pak të shkëputur nga Mali i Gjerë, e ngritur në një pikë vrojtuese rreth 370 m mbi nivelin e detit. Krahasuar me kalatë mesjetare të tjera të vendit, kjo kala është më e vogël nga sipërfaqja dhe ruhet në gjendje më të mirë. Gjerësia është 75 m dhe gjatësia 500 m. Për t’u shtuar rezistencën mureve të kalasë janë ngritur pesë kulla të fuqishme.
