Rama kërkon 71 vota për mocion besimi? Vasili: LSI, jo pjesë e marrëveshjeve parapolitike

Kryetari i Grupit Parlamentar të Lëvizjes Socialiste për Integrim, Petrit Vasili flet për raportet në koalicionin PS-LSI

Kryetari i Grupit Parlamentar të Lëvizjes Socialiste për Integrim, Petrit Vasili, në një intervistë për “News 24” ka komentuar për raportet në koalicionin PS-LSI. Ai është shprehur se koalicioni matet me punën që bëhet në Kuvend dhe me reformat që miratohen. I pyetur se Kryeministri Edi Rama po kërkon 71 votat për të bërë një mocion besimi, Vasili tha se LSI respekton vetëm marrëveshjet politike dhe nuk komenton diskutimet parapolitike. “Ju bëtë një pyetje dhe demonstruat që dini shumë më shumë se sa di unë për këtë çështje. Përsa i takon këtyre mocioneve me 71 vota, besoj se kanë qenë çështje që në mënyrë se si janë konceptuar dhe në mënyrën se si janë mediatizuar, janë mirëfilli parapolitik. Unë personalisht, por edhe LSI, nuk janë pjesë e debateve, diskutimeve dhe marrëveshjeve parapolitike. Pra ne nuk bëjmë marrëveshje parapolitike. Kemi marrëveshje politike të rëndësishme, serioze, të ndërtuara mbi një bazë programore dhe të një ideologjie të majtë dhe kemi pikërisht atë qëndrim tashmë jo më surprizë për shqiptarët”,- tha Vasili.

 Intervista e plotë:

Vasili e nisim së pari me reformën në drejtësi e cila u miratua para rreth 2 javësh. A do të vijoj me po të njëjtin konsumi miratimi i ligjeve të reformës në drejtësi, shtatë ligjeve të përfolura?

Konsensusi i realizuar në mesnatën e 21-22 korrikut sigurisht ishte në mënyrë të padiskutueshme edhe një premisë madhore për të ecur me konsensus edhe me procesin që vijojë. Kjo nuk është një aspiratë dëshirore, por konsensusi realizoi njëkohësisht, jo vetëm veprimin e madh politik të mirëkuptimit të gjerë politik, por realizoi dhe me ndryshimet kushtetuese disa ndryshme të gjithë pranuara të cilat janë themeli i ligjeve të tjera. Pra themelin e ligjeve, pra zemrën e tyre, ne e kemi përcaktuar që në ndryshimet kushtetuese. Ligjet janë zbërthimi i mëtejshëm i këtij kuptimi të ri të drejtësisë, ndaj dhe duke pasur dhe konsensusin në Kushtetutë, kemi zemrën e konsensusit edhe në ligje. Sigurisht ka elemente dhe detaje për të cilat diskutohet dhe është normale të diskutohet. Nuk ka mundësi të kesh disa projektligje, 7 projektligje, por edhe të tjerë që do të pasojnë, po këto që janë të paketës së parë të cilët kanë mjaft elemente, që sigurisht është normale të diskutohen dhe të precizohen, por ama zemrën e konsensusit ne e kemi arritur që në Kushtetutë. Në rast se do të kishim pasur ndasi të madha, nuk do ta kishim pasur një konsensusi të tillë, do të kishim një konsensus të pamundur edhe në 7 ligjet që do të vijojnë.

Ndaj dua të them që ecim në një rrugë të re, ecim me mjaft tabu të rrezuara, dhe me mjaft mure të shembura të mos komunikimit, dhe ecim në atë rrugë të një politike, do të thosha unë, krejtësisht të konceptuar në një mënyrë të ndryshme, që është një çështje e madhe, që është Reforma në Drejtësi, e cila na ka bashkuar në ndryshimet kushtetuese që e jetësonin atë, dhe që na imponon, në kuptimin më të mirë të kësaj fjale, të ecim në këtë rrugë edhe në 7 ligjet që vijojnë. Dhe unë jam besimplotë që do të kemi një përqendrim konsensual edhe për to, dhe kjo do të jetë kohë e fituar, por edhe cilësi e lartë e realizimit të tyre. Pra, do të kemi të dy gjërat shumë të rëndësishme, edhe kohën edhe cilësinë më të larë.

Me hyrjen në fuqi të ndryshimeve kushtetuese në datën 11 gusht, a ka një datë për mbledhjen e seancës së ardhshme plenare, dhe përveç Veting-ut a do të diskutohet edhe Këshilli i Emërimeve në Drejtësi?

Të them të drejtën unë do ta evitoja çështjen e diskutimit me ju për teknikalitete, sepse ju e keni vërejtur që janë çështje të interpretimi të imtë juridik. Ne jemi aty të gatshëm me vullnet politik të plotë, mazhorancë dhe opozitë, pra të gjithë së bashku, që në të gjitha ato afate që ekspertiza do të përcaktojë, ne të jemi të gatshëm, sigurisht brenda gushtit, që të ecim pak me miratimin e ligjit të Veting-ut i cili ka disa lidhje të rëndësishme me çështjet e integrimit evropian dhe për këtë arsye madhore, edhe miratimi i tij do të ishte i shpejtë. Datën, momentin, këto nuk jam në gjendje t’i them as unë e askush tjetër. Por sigurisht ka një vullnet të fortë nga të gjithë për të ecur përpara qoftë njëri, qoftë edhe tjetrin. Edhe në vijim të detyrimeve kushtetuese, por edhe të detyrimeve shumë të rëndësishme të procesit të integrimit që ju e dini që është një prioritet madhor i yni.

Po përflitet ditët e fundit në media se Kryeministri po kërkon të sigurojë 71 vota për një mocion qeverie. Çfarë do të na thonit në lidhje me këtë dhe ndërkohë që ne media përflitet, në rrjetet sociale më tepër, se do të kemi ndryshime në qeveri në vijim të ditëve në vijim, ndoshta dhe në shtator, flitet në fakt se Kryeministri mund të lëshojë edhe një ministri edhe për PDIU-në?

Ju bëtë një pyetje dhe demonstruat që dini shumë më shumë se sa di unë për këtë çështje. Përsa i takon këtyre mocioneve me 71 vota, besoj se kanë qenë çështje që në mënyrë se si janë konceptuar dhe në mënyrën se si janë mediatizuar, janë mirëfilli parapolitik. Unë personalisht, por edhe LSI, nuk janë pjesë e debateve, diskutimeve dhe marrëveshjeve parapolitike. Pra ne nuk bëjmë marrëveshje parapolitike. Kemi marrëveshje politike të rëndësishme, serioze, të ndërtuara mbi një bazë programore dhe të një ideologjie të majtë dhe kemi pikërisht atë qëndrim tashmë jo më surprizë për shqiptarët. Pra kemi korrektesën e respektimit të marrëveshjeve, një dimension të qenies tonë politik. Ky është komenti im për këtë çështje. Sa i takon parapolitikës dhe marrëveshjeve parapolitike, sigurisht janë të tjerë mbase më të aftë se unë që edhe dinë ti administrojnë edhe dinë t’i argumentojnë.

Vasili si po funksion koalicioni i majtë i mazhorancës në këto momente, lidhjet mes PS dhe LSI-së? Është përfolur që ka pasur një tendosje edhe para miratimi të Reformës në Drejtësi?

Tani me thënë të drejtën mua më ka qëlluar, por jam shumë i lumtur që më ka qëlluar kjo punë që të kem komunikim me median edhe me News 24 disa sezone verore të njëpasnjëshme edhe mbas 2013. Ka pasur sigurisht edhe me nuanca stilistike të ndryshme në zemër të njëjtën pyetje se si shkon marrëdhënia PS-LSI. Marrëdhënia e PS- LSI është në sytë tuaj. Matet me zbatimin e përditshëm të qeverisjes së vendit, me atë çfarë realizohet në sallën e parlamentit konsensualisht brenda mazhorancës.

Pra, konsensus brenda mazhorancës, jo konsensus me opozitës, për çështje ku ne ndahemi mazhorancë-opozitë dhe sigurisht një motivim reciprok për të realizuar punët e shtetit, të cilat i bashkëndajmë edhe me qeverisjen e vendit me njerëz që përfaqësojnë edhe PS edhe LSI në qeveri. Kjo lloj korrektese dhe ky seriozitet, të cilit ne nuk i shmangemi dhe nuk do ti shmangemi. Për ne serioziteti ndaj punëve të shtetit është një dimension i patjetërsueshëm. Ndërton edhe qëndrimin tonë në koalicion dhe besoj kjo është edhe në sytë tuaj për ta parë. Çfarë i takon thashethemeve, tendosjesh dhe shtendosja janë fenomen që më tepër e studion fizika, në politikë këto maten me aksione politike që janë në sytë tuaj.

Edhe aksioni i fundit për reformën në drejtësi kishte një mazhorancë e cila ishte e tëra në bllok, të cilët për fat të mirë në saj të një aksioni politikë shumë intensive, vendas, sigurisht në mënyrë të veçantë, të një aksioni të cilin spikati qartësia , por dhe këmbëngulja vizonare e Kryetarit të Kuvendit, i cili së bashku me faktorin ndërkombëtar dhe vullnetin e partive politike realizuan një votim konsensual. Por prapë kësaj mazhorance që ishte në bllok për reformën në drejtësi, falë këtij aksioni politik, sigurisht edhe kompromiseve, ju bashkëngjit edhe opozita. Ndaj po them që edhe kjo ishte një provë pozitive për mazhorancën dhe mënyrën se si ajo funksionon.

A do të shkojë në zgjedhje e ardhshme parlamentare LSI në koalicion së bashku me PS sërish?

Tani ju keni bërë një pyetje interesante, por edhe të parakohshme . Ne jemi përpara fillimit të një sesioni parlamentar ku do të miratojmë ligje të rëndësishme, siç është ligji i buxhetit , i cili përcakton dhe mbylljen e këtij mandati qeverisës dhe kemi shumë punë për të bërë për të realizuar këtë pjesë shumë intensive të programit qeverisës. Besoj se kemi këto detyra të mëdha për të kryer dhe kemi kohë akoma për të folur për taktikat elektorale apo për çështje të tjera të cilat mendoj unë që nuk janë të rëndësishme në këtë moment pasi jo vetëm kemi këtë çështje, por kemi edhe implementimin e reformës në drejtësi dhe ju me shumë korrektesë cituat 7 ligjet që ne duhet të miratojmë me shumë nxitim, por edhe me kualitet. Korpusi i ligjeve është deri në 40 të tilla, pra na pret një punë shumë e madhe dhe me përgjegjësi të lartë. Nuk duhet të shpërqendrohemi nga këto objektiva themelore, pasi shpërqendrimi do të ishte në dëm të vendit.

Sot Partia Demokratike ka qenë në një prononcim për mediat ku është akuzuar kryeministri Rama se po e shkel ligjin e Vetting-ut, duke u munduar që ta anashkalojë atë pasi në përzgjedhjen e një gjyqtari në Gjykatën e Strasburgut, ai ka tentuar që ta lërë në terr, dhe ta bëjë përzgjedhjen në dyshime të mëdha. A mund të ndodhë vërtet kjo gjë, domethënë që një gjyqtar të kalojë Vetting-un?

Tani , kjo është shumë e qartë që këtu kemi të bëjmë me çështje interpretimesh. Besoj se më e rëndësishme është që Shqipëria të përfaqësohet në Strasburg me kandidatura dinjitoze, me juristë të cilët e kanë provuar veten e tyre në një kohë shumë të gjatë. Kanë bërë një Vetting edhe profesional, por edhe shoqëror sepse kanë qenë në sytë e publikut. Dhe duhet thënë që qeveria do ecë dhe ka ecur në rrugën e përcaktimit të kandidaturave dinjitoze të cilat tashmë e kanë elementët e Vetting-ut brenda, pasi njerëzit pa integritet sigurisht që do të ishin në syrin e rreptë edhe të medias shqiptare, të opinionit publik, shoqërisë civile. Nuk di që për këta kandidatë për të cilët flitet, personalisht nuk kam qenë i interesuar ta ndjek për këtë problem. Kam pasur besim të plotë se ashtu siç ka qenë tradita më e mirë e jona, të vazhdojmë të çojmë njerëz me integritet në Strasburg. Kështu ka ndodhur në 25 vjet dhe kështu do të ndodhë. Nuk më duket ndonjë çështje e cila meriton ndonjë vëmendje kaq të madhe ky problem. Vetting-u do të thotë skanimi i gjithë masës së gjyqtarëve dhe në mënyrë të veçantë bëhet fjalë në mënyrë kapilare për shumë e shumë që operojnë në terren të cilët do t’i nënshtrohen një Vetting-u patjetër.

A do të nënshtrohen të gjithë gjyqtarët Vetting-ut?

Sigurisht që ligji flet qartë për këtë punë dhe nuk lë asnjë hapësirë keqkuptimi. Kështu që besoj që ky është procesi më i rëndësishëm. Ky proces rrjedh edhe nga detyrimet që Shqipëria ka për të plotësuar vakancën në Strasburg. Është mirë që qeveria ta bëjë sa më parë dhe ka bërë mirë që e ka bërë këtë punë pasi ka shumë çështje për të cilat Shqipëria është në Gjykatën e Strasburgut dhe sa më aktivë të jemi atje, aq më mirë do të jetë pasi një raport i kujdesshëm i Strasburgut e ndihmon Shqipërinë.

Vasili, është folur shpesh kohët e fundit për mundësinë e një qeverie teknike. Opozita e kërkon me ngulm. Ka bërë një kërkesë për të gjitha palët politike që t’i bashkohen kësaj ideja të saj për zgjedhjen e një qeverie teknike në mënyrë që të përgatisë zgjedhjet të ndershme. Si e shihni këtë kërkesë të opozitës dhe a do të garantonte vërtet zgjedhje të drejta një qeveri teknike në këto kushte?

Sa do të garantonte dhe për çfarë do të duhet qeveri teknike dhe si e percepton opozita këtë gjë, janë pyetje të cilat shkojnë të gjitha për opozitën. Është diskutuar njëherë të vetme mundësia e një qeverie ekspertësh, dhe kjo tezë është ngritur nga Kryetari i Parlamentit, z. Ilir Meta me një qëllim të vetëm: përpara reformës në drejtësi në rast se duhej një sakrificë e tillë për të hequr mosbesimin që diktonte për të realizuar konsensusin. Pra do të thotë që të kishim reformë me 140 vota. Përse duhej kjo? Sepse drejtësia që po ndërtojmë, është një drejtësi e projektuar për disa dhjetëvjeçarë. Tridhjetë vjet më shumë se kaq. Ky projektim në kohë kalon mazhorancat katërvjeçare shumë herë dhe ishim gati të vinim në dispozicion gjithçka vetëm që kjo të realizohej. Pra të kishim një drejtësi solide, të besuar në kohë. Nuk kishte të bënte me realizimin e një objektivi elektoral, ku di unë, Partisë Demokratike apo të partive të tjera në aleancë. Ky mosbesim u largua, sepse palët u ulën në tavolinë. U darovitën të gjitha keqkuptimet dhe dyshimet, arritën një kompromis të cilën dhe faktori ndërkombëtar ishte tepër aktiv. Keni shumë parasysh jo vetëm Venecian gjatë gjithë procesit, për rolin kyç të znj. Nuland, rolin e jashtëzakonshëm të Komisionerit Hahn dhe në mënyrë të veçantë për rolin e dy raporterëve, z. Fleckenstein dhe z. Kukan. Të gjithë së bashku realizuam këtë gjë. Z. Meta në atë kohë hodhi edhe idenë që në rast se duhej një sakrificë e tillë, për hir të kësaj reforme, jemi gati ta bëjmë. Jashtë saj, rrëzimi i qeverisë etj, është një kërkesë normale e çdo opozite që në ditën që ajo futet në sallën e parlamentit që ta kërkojë dhe duhet ta kërkojë. Por nuk është çështja jonë që e zgjidh apo jo. Ne kemi disa objektiva themelorë si mazhorancë. Do të thotë që përpara të realizojmë ato dhe ndërkohë edhe opozita është në drejtën e saj që të bëjë çdo kërkesë që mendon ajo.

Partia demokratike ka venë kushtet e saj dhe për reformën zgjedhore. A do të kërkohet konsensusi për këtë reformë shumë të rëndësishme?

Nuk shoh ndonjë gjë të vështirë në reformën zgjedhore të them sinqerisht këtë gjë, pasi themeli i reformës, sistemin dhe mjaft gjëra të tjera ne i kemi kapërcyer. Ne kemi një plan pune , një rrugë ecje që përcaktohet nga OSBE-ODIHR-i i cili thotë se ku duhet që ne të mëshojmë dhe ku duhet të përmirësojmë për të patur cilësi më të lartë në zgjedhje. Pra mund të ecim në këtë çështje dhe unë besoj se nuk ka ndonjë konsensus të pamundur apo të vështirë kur gjërat themelore i kemi kaluar. Reforma zgjedhore është një reformë që është bërë kohë pas kohe, nuk është si reforma në drejtësi. Unë mund ta quaja edhe një reformë rutinore nëse doni pasi para çdo zgjedhjeje, ne kemi bërë një gjë të tillë. Tani na duhen edhe disa plotësime të tjera. Do t’i plotësojmë. Nuk ka pasur asnjëherë reformë zgjedhore që ka kaluar pa konsensus. Rruga e konsensusit është goxha më e shtruar në reformën zgjedhore. Nuk shoh, përveç ndonjë theksim politik që është normal se kështu ndodh, nuk shoh ndonjë problem themelor, në substancë që ta pengojë atë .

Diçka në lidhje me LSI dhe PD. A kemi një përafrim të këtyre dy forcave politike, ndërkohë që dhe kreu i PD-së Lulzim Basha në një prononcim të dhënë kohët e fundit për mediat nuk ka hedhur më akuza në drejtim të kryeparlamentarit Ilir Meta. Madje ka thënë se është mbajtës i një qeverie dhe se ky mund të cilësohet si problemi i tyre aktual?

Nuk ka ndonjë gjë të paqartë në këtë histori. Është fare e qartë. Ka pasur nevojë për të pasur më shumë komunikim me PD, si forca përfaqësuese më e rëndësishme e opozitës së vendit për një çështje madhore siç ishte reforma në drejtësi. Z. Meta ka prirë një aksion të rrëzimit të keqkuptimeve të mëdha për çështje të mëdha. Ka bërë shumë mirë, ka një aksion për të cilin ai ka pasur një mbështetje nga ana e partisë që ai drejton. Jo thjesht se e ndërmori ai dhe jo thjesht se partia duhet ta mbështeste thjesht se ishte një nismë që ndërmori kryetari i saj, por ka qenë mirëkuptim që ai ka bashkëndarë që përpara se të ndërmerrte këto hapa për një arsye shumë të thjeshtë. Reforma madhore kërkojnë mirëkuptimin. Të qenit në një llogore është një sjellje që ka qenë një gjë normale në vitet ‘91 ku të pamësuar me politikën, këtë gjë e bënte politika shqiptare.

Pas 25 vjetësh me një objektiv madhor siç është integrimi, ne tashmë jemi edhe pjesë e aleancës së NATO-s, nuk mund të sillemi me një provincializëm ku nuk mund të komunikojmë e të flasim edhe për reforma madhore. Do na duhet gjëra të tjera të mëdha që do kenë të bëjnë me procesin e integrimit evropian. Ne do na duhet ta prekim Kushtetutën përsëri për çështje që i takojnë integrimit evropian. Do vijë momenti kur ne të hapim negociatat për anëtarësim. Ç’do të bëjmë, opozita apo mazhoranca që do të alternojnë njëra-tjetrën, nuk do të komunikojnë? Thënë e gjithë kjo, me PD-në ka pasur një bashkëpunim politik, pra një komunikim politik për të zhbllokuar situatën e reformës në drejtësi, që ka qenë pozitiv pasi është thënë qartë: që çështja e mbetur pezull e që kishte të bënte me rekomandimin 88, ku opozita ishte e vendosur në parim drejt për disa çështje që edhe Venecia i kishte dhënë të drejtë, kjo çështje u zhbllokua, reforma në drejtësi ecën në rrugën konsensuale, sikurse vazhdon konsensualisht reforma. Konsensualisht vazhdojmë të kemi distancat tonë duke qenë në të majtë e në të djathtë, në mazhorancë dhe në opozitë. Pra, nuk zeruam distancat apo ndeshjen politike për ato që janë çështje botëkuptimore tonat, gjetëm mirëkuptimin dhe kemi bërë shumë mirë që gjetëm mirëkuptimin për një çështje madhore siç ishte reforma në drejtësi. Kush kërkon të bëjë “Summer Pages” apo thashethemet e verës apo ta ushqejë, prapë edhe ai është në të drejtën e tij, kushdo thotë populli bën qejfin e tij.

Vasili, kalojmë te zgjedhjet për Kryetarin e Bashkisë Dibër që zhvillohen më 11 shtator. Konsiderohen edhe si një test për koalicionin. A do të dilni me një kandidat të vetëm, PS dhe LSI?

Në fakt, dua të bëjë një korrigjim. Nuk është test për koalicionin një votim lokal. Ne kemi insistuar edhe kur zgjedhjet ishin lokale ishin të tëra së bashku në qershorin e vitit 2015, që ato të trajtoheshin si zgjedhje lokale pasi kjo u duhet qytetarëve dhe ky është dimensioni i tyre. Ka edhe nga ata që kërkojnë t’u japin ngjyrime të tjera zgjedhjeve lokale, opozita edhe mund ta bëjë pasi sigurisht kërkon të maksimizojë çdo rezultat, çdo fitore, çdo çështje politike, sepse kjo është edhe detyra e saj, por në themelin e tyre ato janë zgjedhje lokale. Janë të tilla dhe do të vazhdojnë të ecin si të tilla. Janë zgjedhje të parakohshme që ndodhin në një komunitet të caktuar. Nuk ka akoma një kandidaturë zyrtare të maxhorancës, sigurisht do të ketë një kandidaturë të vetme dhe forcat tona politike në nivel lokal do të ndërtojnë edhe bashkëpunimin elektoral atje se si nga ana taktike do të ecin më mirë për të arritur një rezultat fitues atje.

Është përmendur edhe emri Dionis Ymeraj si kandidaturë e mundshme e mazhorancës…?

Nuk e njoh sinqerisht. Në këtë pikë nuk jam familjar lidhur me emrin, me kandidaturën përkatëse, po di këtë gjë si një nga drejtuesit e LSI-së që do të ketë një konkurrim lokal. Nuk do të shkojë e gjitha PS-ja dhe LSI-ja në Dibër të bëjnë fushatë për këtë gjë sepse kanë objektiva, kanë për detyrë të punojnë dhe t’u përgjigjen detyrimeve të pushtet lokal në çdo cep të vendit. Atje sigurisht ka një rivalitet lokal në këtë moment, ato së bashku do të ndërtojnë edhe bashkëpunimin në terren ashtu si duhet, pra ajo gjë që bëhet rëndom në çdo fushatë elektorale.

A ka negociata z. Vasili për një emër zyrtar dhe kur do të dalë ky emër zyrtarisht pasi më 19 gusht është edhe afati i fundit….?

Po të mos kishim miratuar ende reformën në drejtësi, unë jam i sigurt se ju nuk do më kishit bërë asnjë lloj pyetje lidhur me këtë çështje. A ka nevojë për negociata kaq të mëdha për të rënë dakord për një kandidaturë në një prej 61 bashkive të vendit…? Brenda afateve kushtetuese sigurisht që çdo gjë do të mbyllet. Është një formalitet, një negocim nga më të lehtit dhe të parëndësishmit.