Rehabilitimi i lotit të tretë të lumit Gjanica po vijon me intensitet, si pjesë e transformimit urban që po përjeton qyteti i Fierit. Investimi i qeverisë shqiptare, nëpërmjet Fondit Shqiptar të Zhvillimit (FSHZH), pritet të ketë ndikim të drejtpërdrejtë në përmirësimin e cilësisë së jetës në qytet. Kryeministri Edi Rama i shoqëruar nga zëvendëskryeministrja dhe ministrja e Infrastrukturës dhe Energjisë, Belinda Balluku, kryetari i bashkisë së Fierit, Armando Subashi dhe drejtori i FSHZH-së, Dritan Agolli, inspektuan nga afër punimet në lotin e tretë të këtij projekti.
“Në kantierin e punimeve të lotit 3 të projektit të rigjenerimit dhe mobilimit urban të lumit Gjanica, deri dje një gangrenë mjedisore e mbindotur në tërë gjatësinë e lumit, e burim përmbytjesh në zemër të qytetit, ndërsa sot një nga shëtitoret më të bukura në Shqipëri, e cila e plotëson mozaikun e transformimit urbanistik që vazhdon në Fierin e rilindur”, tha Rama.
Nga ana e saj, Balluku e cilësoi këtë si një nga projektet më të rëndësishme për qytetin e Fierit. “Është bërë një pjesë e mirë e pastrimit të sipërfaqes për gjithë ndërtimin e lotit të tretë”, tha ajo. Drejtori i FSHZH-së, Dritan Agolli, theksoi se loti i tretë, me gjatësi 5 kilometra, plotëson të gjithë gjatësinë e lumit Gjanica brenda qytetit. “Mund të jetë shëtitorja më e madhe që mund të ketë ndonjë qytet në Shqipëri. Nga një plagë urbane, po kthehet në një shëtitore dhe hapësirë të gjelbër”, u shpreh Agolli.
Ai shtoi se deri në muajin gusht pritet të përfundojë betonimi i shtratit të lumit, ndërsa i gjithë projekti synohet të përfundojë brenda këtij viti, duke u integruar me dy lotet e tjera të realizuara më parë. Rehabilitimi i lumit Gjanica është pjesë e një vizioni më të gjerë për rikonceptimin e qendrës së qytetit të Fierit, që përfshin gjithashtu ndërtimin e Pallatit të Sportit dhe rregullimin e sheshit qendror një hapësirë publike që i kishte munguar qytetit. Ky projekt synon të rikthejë lumin Gjanica si një nga asetet natyrore dhe rekreative më të rëndësishme në zonën urbane të Fierit.