Kryeministri Edi Rama deklaroi sot se nuk ishte nevoja për ndihma të tjera ushqimore, pas situatës së rëndë të krijuar nga tërmeti i ditës së martë. “Ju lutem mos dërgoni më ndihma ushqimore dhe rroba. Kanë ardhur pafund dhe hapësirat e magazinimit po shterren. Në Portin e Durrësit s’ka më kapacitet për depozitimin e tyre dhe nevoja është përmbushur e tejkaluar, falë shumë njerëzve, sipërmarrjeve, organizatave, institucioneve brenda e jashtë! Gjynah nga Zoti të skadojnë a të kalben nga mospërdorimi”,- deklaroi kryeministri Edi Rama paraditen e sotme.
Kjo deklaratë e kreut të qeverisë duket e pavend kur sheh fotot e mëposhtme të agjencisë LSA të Gent Shkullakut që janë marrë nga kampi ku ndodhen banorët e prekur nga tërmeti në Durrës.
Mundet që nënteksti kryeministror ishte që kontribuesit dhe donatorët duhet të sjellin para dhe projekte për të ndërtuar shtëpitë e të prekurve nga tërmeti e jo vetëm ushqime. Por fotot e Shkullakut janë dërmuese për menaxhimin e situatës nga qeveria.
