Referendumi i PS, Balla thirrje për pjesëmarrje masive

Nënkryetari i grupit parlamentar të PS-së, Taulant Balla, në një deklaratë për shtyp të mbajtur paraditen e sotme ka deklaruar se referendumi i 9 prillit do të jetë i hapur për të gjithë anëtarësinë e PS, ndaj dhe ka bërë thirrje për një pjesëmarrje sa më masive.

“Referendumi i kësaj fundjave, përveçse një vendimmarrje e përbashkët për një çështje me rëndësi të veçantë, do të jetë edhe hapja e rrugës për përfshirjen e çdo anëtari të PS. Ky referendum do të ofrojë mundësinë që ata të thonë fjalën e tyre përfundimtare për një debatin tonë të brendshëm”, ka deklaruar Balla.

Ai është shprehur gjithashtu se një PS më e hapur, më moderne e më gjithëpërfshirëse përbën një hap të rëndësishëm për zhvillimin e Shqipërisë.

“Pra, është një referendum jo vetëm për të vendosur për mandatin e kryetarit të PS. Kjo është një praktikë që ne e fusim për herë të parë dhe që shpresojmë që ta bëjmë edhe për çështje të tjera në të ardhmen. I rëndësishëm nga ky referendum nuk është rezultati, por pjesëmarrja masive”, ka thënë Balla.