Reforma në drejtësi jo me deputetë të inkriminuar”

Deputetja demokrate, Majlinda Bregu, pjesmarrëse në samitin e Vjenës, tha në një intervistë për Ora News se ky takim mes lidërve të Ballkanit dhe të BE e zbehu rendësinë përballë problematikës që po ndeshin mjaft vende të Ballkanit; atë të largimeve masive. Bregu komentoi dhe reformën në drejtësi për të cilën tha se nuk mund të votohet nga deputete më preçedentë penalë.

Majlinda Bregu, ish-Ministre e Integrimit ka qenë syri dhe veshi i opozitës në Samitin e Vjenës.

Në studion e Ora News, Majlinda Bregu, tha se çështja e klandestinëve mori hapësirën më të madhe të diskutimeve duke e zbehur pak rëndësinë e Samitit për Ballkanin Perëndimor.

Bregu: “Në pasditen kur u zhvillua Samiti lajmi kryesor ishte lajmi i kapjes së një kamioni të mbushur me njerëz 40 km larg Vjenës, gjë që tregon që ka një klimë që nuk është e mirë as mes vendeve anëtare të BE. Sidomos situata e azilit gjatë gjithë këtij viti ka krijuar problematika edhe ndërmjet tyre dhe kjo nuk është një gjë e re.

Sakohë ka një mungesë lidershipi politik të theksuar në vendimarrjen e lartë të BE për çështjet që i përkasin Europës në përgjithësi, por edhe problematika të shtuara nga kriza si rasti i Greqisë, kjo ka krijuar ndjesi për të dyja palët.

Ne presim më shumë dhe jemi më të nxituar duke treguar se me zor po presim të jemi anëtarë të BE, por e kërkojmë këtë thënë sikur ju po na bëni një padrejtësi të madhe që nuk na hapni negociatat që sot, apo nuk i keni hapur dje. Ndërkohë që harrojmë atë që është kryefjalë e këtij proçesi. Nuk ka nevojë BE për asnjë vend që nuk është në gjendje të zbatojë standardet brenda vendit të tij”.

Largimin e shqiptarëve për të kërkuar azil në Gjermani, deputetja demokrate e sheh si dështim të qeverisë Rama në politikat e saj ekonomike dhe sociale, çka sipas saj do të çojë drejt protestave.

Bregu komentoi për Ora News dhe reformën në drejtësi për të cilën u shpreh se nuk mund të votohet nga deputetë me preçedentë penalë.

Bregu: “Të bëhet reformë në drejtësi do të thotë që të kemi pikësëpari ata politikanë apo ata parlamentarë të cilët do ta votojnë të lirë në gjykimin e tyre dhe jo me preçedent kriminalë nga pas. Reforma në drejtësi nuk mund të kalojë pa u kryer proçesi i dekriminalizimit,i cili ka mbetur më shumë retorikë e debateve dhe gjuhës në studio televizive dhe nuk ka asgjë reale dhe as konkrete që të ketë ndodhur gjatë këtyre muajve”.