Reforma në drejtësi, konstitucionalistët ndahen për vendimin e Kushtetueses

Vendimi i djeshëm i Gjykatës Kushtetuese për pezullimin e ligjit për rivlerësimin e gjyqtarëve dhe prokurorëve deri në shqyrtimin në themel të kërkesës së Partisë Demokratike që kërkon rrëzimin e tij si antikushtetues, është një vendim që prek drejtpërdrejt të ardhmen e anëtarëve të kësaj gjykate.

Sipas konstitucionalistëve, Çlirim Gjata dhe Arjan Vajsari ajo që vuan më shumë nga ky vendim është pikërisht Reforma në Drejtësi, për shkak se sipas Kushtetutës, kjo gjykatë nuk ka asnjë afat shqyrtimi të kërkesës finale, duke bërë që reforma të shtyhet në kohë, minimalisht pas zgjedhjeve të vitit 2017.

“Është problemi i konflikti të interesit që ka kjo Gjykatë Kushtetuese, pasi do t’i nënshtrohet edhe vet procesit të ‘Vetting’-ut. Pra ajo po gjykon një ligj, që do ta gjykojë edhe atë, do ta kontrollojë edhe Gjykatën Kushtetuese”, shprehet Çlirim Gjata.

“Unë e shikoj si një zgjidhje në kushtet e mungesës së një rrugëdaljeje që kishte Gjykata Kushteteuse, e cila nëse do të shprehej për antikushtetutshmërinë, ajo që kishte kërkuar opozita, do të akuzohej për konflikte interesi”, thotë Arjan Vasjari.

Ish-kryetari i KQZ-së shprehet se nëse ‘Venecia’ i jep një minus sado të vogël këtij ligji, atëherë Gjykata Kushtetuese do ta rrisë masën e minusit.

“Ajo ku do të mbështetet ‘Venecia’, thelbi i saj është fakti nëse ky ligj i tejkalon ato që ka vendosur Kushtetuta e re, apo nuk i tejkalon? Cënohet sadopak parimi i pavarësisë së gjyqësorit nga ky ligj? Po qe se ata arrijnë në mendimin që cënohet sadopak, këtu nuk të fal Europa, këtu s’të fal Venecia. Kështu që, nëse ‘Venecia’ i jep një minus sado të vogël këtij ligji, atëherë Gjykata Kushtetuese do ta rrisë masën e minusit. Kjo do të bëjë që gjithçka të kthehet nga e para. Atëherë e gjithë ajo Kushtetutë, 140 votat dhe për më keq të gjitha ato duartrokitje do të presin, ndoshta edhe pas zgjedhjeve”, tha Gjata.

“Jemi absolutisht në kohë për të parë, absolutisht përpara zgjedhjeve dhe nuk ka lidhje fare me zgjedhjet, të shohim të implemetuar konkretisht aplikimin e Reformës në Drejtësi dhe të ‘vetting’-ut, i cili në fakt ngelet ‘thembra e Akilit’, në fakt është vet reforma. Jam i bindur që nuk ka lidhje fare me zgjedhjet. Por besoj që ky është një impas totalisht kalimtar, që nën gjykimin tim nuk do të prekë aspak në terma kohorë e jo substancialë, aplikimin e Reformës në Drejtësi dhe ‘vetting’-un, besoj në harkun kohor të 60-90 ditëve”, tha konstitucionalisti Arjan Vasjari. / TCh