Refuzuan dosjen e Shullazit, Arta Marku nis hetim për 10 prokurorë

Prokurorja e Përgjithshme, Arta Marku ka urdhëruar nisjen e hetimeve për 10 kolegë të saj në Prokurorinë e Krimeve të Rënda. Hetimi disiplinor nis për shkak të refuzimit nga ana e prokurorëve për të marrë pjesë në heshtjen e shortit për përfaqësimin e dosjes së Emiljano Shullazit në Gjykatë.

“Prokurori i Përgjithshëm znj. Arta Marku duke marrë shkas nga ngjarja e fundit e datës 19 shtator 2018 në Prokurorinë pranë Gjykatës së Shkallës së Parë për Krime të Rënda, Tiranë, mbi refuzimin nga ana e prokurorëve për hedhjen e shortit në procedimin penal në gjykim në ngarkim të të pandehurve Emiljano Shullazi, Gilmando Dani, Endrit Qyqja, Endrit Zela dhe Blerim Shullazi, për kryerjen e veprave penale parashikuar nga nenet 109/b; 333/a; 334 etj.të Kodit Penal urdhëroi fillimin e hetimit disiplinor ndaj prokurorëve”,- thuhet në njoftimin e Prokurorisë.

Emrat e prokurorëve që do hetohen

Olsian Çela

Përparim Kulluri

Behar Dibra

Sonila Muhametaj

Arenc Çela

Edvin Kondili

Pranvera Pustina

Eugen Beçi

Blerim Tominaj

Besim Hajdarmataj