Sali Berisha: Zgjedhjet nuk do të njihen kurrë!

Kreu i PD-së, Sali Berisha, ka dalë në një konferencë për mediat për të folur sërish lidhur me zgjedhjet e 11 majit.

Berisha ka publikuar një video, që sipas tij tregon momentin e shpërndarjes së parave për vota në zonën e Babrrusë, në Tiranë.

Ndër të tjera Berisha tha Partia Demokratike nuk do t’i njohë kurrë zgjedhjet e 11 majit.

“Narkoqeveria e Edi Ramës nuk u mjaftua me 76 milionë euro të shpërndara si bonus pensionistësh, që përbëjnë 48% të votuesve, as me 200 milionë euro të falura në gjoba dhe kamata, e as me firmosjen masive të lejeve të legalizimit e certifikatave të pronësisë. Përdorën makinat e shtetit, punësuan mijëra njerëz në mënyrë të përkohshme vetëm për të siguruar votën. Por kaluan edhe në blerje të drejtpërdrejtë të votës, me para në dorë.

Nuk u mjaftua me punësimin e mbi 10 mijë punonjësve për votë në qeverisjen lokale dhe qendrore, por ajo kaloi direkt dhe në blerje vote duke shpërndarë fshehtas para për zgjedhësit shqiptarë.

Natyrisht shpërndarja e fshehtë e parave është vështirë të kapet sepse ata që kryejnë këtë krim elektoral, bëjnë çdo gjë që të fshihen gjurmët e tij dhe të mos dalë.

Megjithatë kamerat e qytetarëve syçelët kanë filmuar momentin kriminal të ndarjes së parave për vota.

Dhe kjo jo të themi pas Dajtit apo në Mokër apo në Tropojë apo në zonat më të largëta.

Jo, kjo në Tiranë, në Babrru dhe urdhëroni videon që do u paraqes sot para jush”, tha Berisha.