Gjykata Kushtetuese pranon pjesërisht kërkesën e studentëve të Mjekësisë për ligjin që i detyron ata të punojnë 5 vite brenda vitit, përndryshe nuk marrin diplomën. Deputetja e PD-së Jorida Tabaku, thotë se vendimi dëshmoi se institucionet janë një shans për demokracinë dhe sundimin e ligjit. Ndërsa nisma u çua në Kushtetuese nga një grup studentët dhe grupi parlamentar i Partisë Demokratike, Tabaku thekson se kjo është një provë e fortë se opozita është në shërbimin e qytetarëve jo vetëm duke denoncuar por edhe duke punuar për to.
Postimi i plotë
Kur politika është në shërbim të qytetarëve! Një grup studentësh patën vizionin, vendosmërinë dhe besimin për ta çuar betejën e tyre në institucione. Patën besimin se së bashku me Grupin Parlamentar të Partisë Demokratike do të mund të zhbënin nismën antikushtetuese të ndërmarrë nga qeveria.
Sot, padia e dorëzuar në GJK nga palët dëshmoi vërtetësinë dhe sinqeritetin e kauzës. Dëshmoi se institucionet janë një shans për demokracinë dhe sundimin e ligjit. Shfuqizimi i detyrimit për studentët e mjekësisë të qëndrojnë në Shqipëri për 5 vite pas përfundimit të shkollës është fitorja e studentëve.
Njëkohësisht dhe një dëshmi se si politika mund t’i shërbejë qytetarëve. Një provë e fortë se si opozita është në shërbimin e qytetarëve jo vetëm duke denoncuar por edhe duke punuar për to. E gjitha kjo mund të arrihet përmes institucioneve, forcës së argumentit dhe vërtetësisë së bindjeve se bashkë mund t’ia dalim.