Shkon në 93 numri i të vrarëve në Moskë gjatë një koncerti

Numri i viktimave të sulmit terrorist në një ambient koncerti në Krasnogorsk, afër Moskës, është në rritje. Sipas agjencisë së lajmeve Reuters, duke cituar informacione nga rrjeti rus Baza, të paktën 93 persona kanë vdekur. Muzikantët e grupit Picnic nuk u lënduan gjatë të shtënave, tha menaxheri i tij Yuri Chernyshevsky për TASS.

Organizata xhihadiste Shteti Islamik mori përgjegjësinë për sulmin, përmes një postimi në Telegram. Reuters raporton se ajo është postuar në një  kanal Telegram të Shtetit Islamik. Në deklaratën e plotë thuhet: “Militantët e Shtetit Islamik sulmuan një grumbullim të madh të krishterësh në qytetin Krasnogorsk në periferi të kryeqytetit rus, Moskë, duke vrarë dhe plagosur qindra dhe duke shkaktuar shkatërrim të gjerë në vend përpara se të tërhiqeshin në mënyrë të sigurt në bazat e tyre”.

Duhet theksuar se sipas asaj që dimë autorët nuk janë arrestuar apo neutralizuar. Shteti Islamik, nga ana e tij, pretendon se njerëzit e tij janë tërhequr të sigurt në bazën e tyre. Zyrtarët amerikanë nxituan të konfirmojnë se SHBA-të kanë informacione që konfirmojnë se Shteti Islamik pretendon se ka kryer sulmin në Moskë. Në informacion thuhet se autoritetet kanë vazhduar me arrestimin e një të dyshuari. Në të njëjtën kohë, u lëshuan urdhër-arreste për tre persona nga rajoni Ingushetia me shumicë myslimane në Rusinë jugore.