Shqipëria vazhdon të bjerë në raportin e lirive, në 2016 “vend pjesërisht i lirë”

Organizata “Freedom House” ka publikuar raportin më të fundit për lirinë në botë, sa i përket vitit 2016.  Në raportin me titull “Liria në botë 2017”, për të drejtat politike dhe liritë civile, theksohet se për të 11-in vit me radhë shënohet rënie në lirinë globale.

Shqipëria në këtë raport renditet si një vend pjesërisht i lirë, ashtu si dhe vitin e kaluar. Në këtë kategori janë edhe 58 vende të tjera, përfshirë: Kosovën, Bosnjë e Hercegovinën, Maqedoninë dhe Malin e Zi.

Kroacia dhe Serbia vlerësohen “të lira”. Në këtë kategori janë 87, nga 195 shtete gjithsej, sa janë përfshirë në raportin për liritë në vitin 2016. Në kategorinë “jo të lira” janë 49 vende.

Organizata “Freedom House”, me seli në Shtetet e Bashkuara, thotë se në 67 vende është shënuar rënie në të drejtat politike dhe liritë civile vitin e kaluar, që është numër gati dy herë më i madh se ai i vendeve ku janë regjistruar përmirësime.

“Njëri prej shkelësve më të mëdhenj në vitin 2016 ishte Rusia”, vlerëson Freedom House.

Sa i përket Ballkanit, raporti “Liria në Botë 2017” vlerëson se proceset korrekte zgjedhore dhe sundimi i ligjit janë përkeqësuar, ndërsa Bashkimi Evropian ka neglizhuar rolin e vet në promovimin e demokracisë në mesin e shteteve që synojnë pranimin në union.