Sot zgjedhjet e parakohshme në Serbi, kjo mund të shënojë fillimin e rënies së Aleksandër Vuçiç

Sot do të zhvillohen zgjedhjet e parakohshme në Serbi, ku Aleksandër Vuçiç synon të çimentojë pushtetin e tij. Vota e serbëve këtë të djelë do të shkojë për të rinovuar parlamentin kombëtar, si dhe asamblenë e provincës autonome të Vojvodinës dhe kryetarët në rreth 60 komuna, duke përfshirë kryeqytetin, Beograd.

Sipas një analize të Instituti Italian për politikën e jashtme ISPI, këto zgjedhje me siguri do të shënojnë herën e parë që kur Vuçiç mori pushtetin në vitin 2012, që Partia Progresive Serbe, nuk do të jetë në gjendje të formojë qeverinë.

Jo vetëm për të qeverisur e vetme, por sipas studimit as duke u përfshirë në një koalicion me partnerin e saj tradicional, Partinë Socialiste të vendit. Votimi i së dielës përfaqëson një mundësi historike për opozitën, që mund të rezultojë më e fortë se në të kaluarën dhe mund të jetë në gjendje të formojë një koalicion qeverisës të paktën në kryeqytet.

Për regjimin e Vuçiqit, kjo mund të jetë dominoja e parë që çon në rënien përfundimtare të pushtetit të tij. Sipas studimit të ISPI çështja e Kosovës, Trumpi, Rusia dhe Lindja e Mesme do të jenë disa nga elementët që do të ndikojnë në rezultatin e këtyre zgjedhjeve, teksa gjeopolitika e Serbisë mbetet e rëndësishme për qytetarët atje.

Përpara se të vlerësohet ndikimet e huaja, është e rëndësishme të theksohet se zgjedhjet në Serbi do të mbahen në një mjedis shumë dinamik gjeopolitik dhe të sigurisë. Para së gjithash, zgjedhjet u shpallën një muaj pas incidentit të dhunshëm në fshatin Banjskë në veri të Kosovës, ku u vra nga grupi paramilitar i Milan Radoiçiç, oficeri i policisë së Kosovës Afrim Bunjaku.

Banjska mund të ndikojë te votat për partinë e Vuçic, edhe pse Presidenti u përpoq që në një fjalim pas ngjarjes ta cilësonte ngjarjen në Veri si një ‘gabim taktik’.

Nisur nga konteksti, shumë ekspertë argumentojnë se zgjedhjet e parakohshme jo vetëm që do ta ndihmojnë Vuçiçin të largojë vëmendjen e publikut nga incidenti i Banjskës dhe zemërimi publik dhe protestat masive të shkaktuara nga dy të shtënat masive vdekjeprurëse të majit të kaluar, por gjithashtu do t’i ofrojnë presidentit serb hapësirë për manovrim në marrëdhëniet e jashtme, pra për të shtyrë edhe një herë çështjet e pakëndshme, si vendosja e sanksioneve kundër Rusisë dhe arritja e një kompromisi përfundimtar për Kosovën, deri në verën e ardhshme.