Tabaku dhe Bardhi në Berlin, çfarë u diskutua për rrugën e integrimit europian të Shqipërisë?

Gazment Bardhi, përmes një postimi në rrjetet sociale, të shoqëruar me një fotogaleri nga vizita zyrtare në Berlin, ka ndarë detaje mbi një sërë takimesh që, sipas tij, pasqyrojnë qartë pritshmëritë dhe shqetësimet e partnerëve europianë ndaj procesit të integrimit të Shqipërisë.
Ai thekson se delegacioni shqiptar pati mundësinë të zhvillojë dy takime të rëndësishme në Bundestag, konkretisht në Komisionin për Çështjet Europiane dhe në Komisionin për të Drejtat e Njeriut, ku ishin të pranishëm përfaqësues si të opozitës ashtu edhe të mazhorancës në Kuvendin e Shqipërisë. Këto takime, sipas Bardhit, shërbyen si një platformë e drejtpërdrejtë dialogu për të reflektuar mbi ecurinë e reformave dhe sfidat që vendi përballet në rrugën drejt Bashkimit Europian.

Në thelb të diskutimeve, ai nënvizon se Gjermania mbetet një mbështetëse e fortë e integrimit të Shqipërisë në Bashkimi Evropian, por mbi bazën e meritës dhe përmbushjes së standardeve të kërkuara. Bardhi shpreh mirënjohjen për ndihmën e deritanishme gjermane, duke vlerësuar veçanërisht faktin që anëtarët e Komisionit për Çështjet Europiane ishin të mirëinformuar mbi zhvillimet e brendshme politike dhe institucionale në Shqipëri.
Sipas tij, interesi dhe pyetjet e deputetëve të Bundestagut u përqendruan në çështje kyçe që lidhen drejtpërdrejt me themelin e një shteti funksional demokratik: forcimin e shtetit ligjor, luftën kundër korrupsionit dhe krimit të organizuar, si dhe problematikat që lidhen me pengimin e drejtësisë, përfshirë rastin e Belinda Balluku. Po ashtu, në vëmendje ishin zhvillimi ekonomik, garantimi i barazisë gjinore dhe respektimi i të drejtave të njeriut, si dhe orientimi i politikës së jashtme shqiptare në përputhje me linjën e BE-së.
Një tjetër pikë diskutimi, sipas Bardhit, ishte edhe qasja e re e raportuar mes Edi Rama dhe Aleksandar Vučić në raport me procesin e integrimit europian, e cila ka ngjallur interes dhe kërkesë për sqarime nga ana e ligjvënësve gjermanë.
Së bashku me Jorida Tabaku, që përfaqësonin opozitën në këto takime, Bardhi rithekson se, në vlerësimin e tyre, qeveria shqiptare nuk po arrin të përmbushë standardet e kërkuara, por përkundrazi po shfaq tendenca regresi që rrezikojnë të zbehin perspektivën europiane të vendit. Ai nënvizon se korrupsioni i përhapur dhe mungesa e barazisë para ligjit mbeten pengesa serioze për avancimin e reformave.
Në përmbyllje të mesazhit të tij, Bardhi thekson një qëndrim të prerë: për Shqipërinë nuk ekziston një alternativë tjetër strategjike përveç integrimit në Bashkimin Europian, por kjo rrugë, sipas tij, nuk mund të jetë thjesht retorike, ajo kërkon standarde reale, institucione funksionale dhe një vullnet të pakompromis për të ndërtuar një shtet të së drejtës.

AV