Të rinjtë serbë hoqën flamujt shqiptarë në Beograd, Rama: Çdo pyll ka derra

Kryeministri Edi Rama ndodhet në Beograd për ”Open Balkan”, dhe në konferencën me gazetarët këta të fundit e pyetën nëse presidenti serb Aleksandër Vuçiç i kërkoi falje për heqjen e disa flamujve shqiptarë nga një bulevard në Beograd.

Sipas kreut të qeverisë, vetë fakti që në Beograd valëviteshin flamujt shqiptarë është diçka e pamendueshme disa vite më parë. Rama solli në vëmendje se situata mes shqiptarëve dhe serbëve është larg së qenit ideale, por vuri theksin tek përmirësimet pozitive që sipas tij kanë sjellë së fundmi politikat e jashtme të ndjekura në Ballkan.

”Jam i bindur që të gjitha gjërat që ndodhin janë të paevitueshme, sepse situata është larg së qeni ideale mes shqiptarëve dhe serbëve për shkak të situatës me Kosovën. Edhe tensione më të larta të ngrihen, sot bien shumë më shpejt nga çdo të ndodhte më parë. Nuk duhet ta humbasim fokusin. Duhet të vendosen në një nivel tjetër marrëdhëniet në rajon”.

Duke folur për marrëdhënien e Kosovës me iniciativën e “Ballkanit të Hapur”, Rama tha se kjo nismë në fakt mund ta fuqizojë procesin e bërjes së paqes.