Tedi Blushi, Zëdhënësi i Presidentit të Republikës, Ilir Meta ka reaguar sot pas deklaratave që kreu i qeverisë, Edi Rama bëri kundër kreut të shtetit.
Në një publikim në Facebook, Blushi shkruan: “Lajmërojeni gruan e Bilalit se Presidenti ka vetëm një shtëpi: Shqipërinë. Sa shtëpi ka gruaja e Bilalit pyeteni vetë”.
I pranishëm në prezantimin e projektit për rindërtimin e banesave të dëmtuara nga tërmeti, Rama sulmoi kreun e shtetit. “Presidenti e ka shtëpinë. Më shumë se një shtëpi. Unë jam këtu për ata që jetojnë në çadra dhe presin që të futen ën shtëpinë e tyre. Për ata jam unë këtu, jo thjesht në këtë konference, por në të gjitha orët e ditës time me gjithë natën. Jua kam lënë juve çështjen e presidentit. Unë nuk merrem me Presidentin. Është shumë luks i madh për mua të merrem me Presidentin”, tha kryeministri.
Pas kësaj deklarate Tedi Blushi i është përgjigjur kryeministrit me nofkën e Gruas së Bilalit, duke i kujtuar historinë e pagesës së jashtëligjshme të 80 mijë dollarëve për një foto me Barak Obamën.